1957: La Visite Royale

 La Visite Royale.

Chein que l'Portifé en pense.

 

Moussieu l'Editeu,

 

Touos les siers la Merrienne liet chais lettres sûs la Post au sujet d'la Visite Royale au mais d'Juillet sans en profité du tout. Avec chonna, quand j'l'y d'mande pour des suggéstions, tout ch'qu'ou raipond ch'est qu'on n'a pas ocquo yeu l'temps de considéthé l'affaithe comme-y-faut.

 

Mais ou voudrait savé, à qu'menchi, pourtchi que l'jour de Visite n'est pas d'vant l'mais d'Juillet. “R'garde, Ph'lip,” ou s'fit hier au sé, “tchèsqu'y peut nous dithe que té et mé, par exemplye, ne s'sont pas dans l'chim'tièthe, avec pûs d'yun d'nos grands hommes? Ouèsque est l'Juré-Justicier, le Sénateur, le Connêtablye et l'Député tch'est asseûthé tch'y s'sa là pour mettre le nouviau chapé tch'y s'en va accaté siez de Gruchy ou Vouoaisin?

 

“Y'en étha trejous assez quand veindra l'jour,” j'l'y dit. “Te r'souveins-tu d'Visite en vingt-yunne quand le Rouai et la Reine vintes ichin pour un jour. Y n'manchait personne sûs la cauchie, dans l's'Etats et dans la Cour Royale, et j'entendit pûs tard qu'yunne ou deux des boutiques en Ville tch'avaient fourni des costumes et des chapiaux ès femmes furent forchies d'envié d's'actions pour avé lus sous.”

 

“Vèthe,” ou dit, “et l'brit couothi que yun d'nos bouons Députés d'Campagne camâillit sa femme quand y vit l'compte, de tchi qu'ou n'bouogit pas d'san liet pour une semaine. Quant à la pouôrre Reine ou s'trouvit si faillyie dans l'arlevée que l'Rouai tait bein gêné. Sans doute ch'tait la grande chaleu.”

 

“Nouffé,” Merrienne dit. “Oulle avait tait en Djérnezi le jour de d'vant, et ou s'trouvit dêjà mal quand ou vint. Ch'est drôle asséz, Ph'lip, mais toutes les fais qu'j'y vais, mé, en Djérnezi, je n'vaut pas quatre sous quand je r'veins. Chutte fais la Visite qu'men'cha en Jêrri, et j'éspèthe que nos gens, en arrangeant l'programme, prendront soin de n'la fatigué pas. Après tout, ou veint ichin, avec le Duc pour une bordée d'pliaisi.”

 

“Oh!” j'dit, “ils éthont du pliaisi, sans autchune doute. Sûs la cauchie ils éthont l'pliaisi d'châtchi d'main avec la nobilité, ch'est-à-dithe le Gouverneux, le Baillyi, le Protchutheux, l'Avocat-Général et tchiques autres. Y s'peut qu'les Jurés s'sont là étout, mais j'en doute, car de nos jours les Jurés n'comptent pas pour grand'chose.”

 

“Nan, malheutheusement,” ou s'fit.

 

“Après chonna,” j'continuit, “ils éthont l'pliaisi, sans doute, de visité la Cour Royale, et d'allé dans l's'Etats pour vais touos nos biaux garçons et r'chevé une adresse. De là ch'est tout probablye qu'nou les prendra à Springfield et qu'nou lûs f'tha présent d'une g'niche r'nouv'lée, épis après y'étha tchique cérémonie au Collége Victoria, si l'temps permet. Les Boy Scouts, les Girl Guides et toute chutte ramâss'sie-là éthont lûs tou, et pûs tard, quand la Reine et s'n'homme éthont mangi siez l'Gouverneux, y'étha une drive à-travers les pâraisses pour vais l's'êfants d's'êcoles. Probablyement étout les mousses de la Ville se rassembliéthont sûs l'parc, toutes les p'tites filles en bianc et les garçons avec de neuves dgènes. Et j'te garantis, que quand veindra la fin du jour, notre chièthe petite Reine s'sa bein contente d'allé s'couochi. Chein qu'y'a d'pièthe ch'est qu'oulle étha un autre fort jour ou deux en Djérnezi, sans pâslé d'Auregny et l's'autres îles.”

 

“J'la pliains bein, notre pouôre Reine,” ou dit. “Je n'prendrais pas sa piéche pour touos les sous qu'y'a dans l'monde. Mé, ocquo, j'peux faithe moyennement comme je veur, et j'n'ai pas ma vie ordonné comme si ch'tais Reine. La s'maine tchi veint quand j'éthai yeu l'temps d'y pensé, j'te dithai p't'être chein qu'je f'thais si ch'tait à mé d'organisé l'programme.”

 

Ph'lip.

1957