1957: L'Assembliée d'Jèrriais

 L'Assembliée d'Jèrriais

 Rêunion mensuelle.

 

La Rêunion Mensuelle eut lieu Vendrédi au sé, lé 22 Fevri, 1957, dans la Salle d'Agritchulture, St. Hélyi, sous la présidence du Sieur Chas. Billot. I'y avait eune soixantaine dé membres présents.

 

Décès.

 

Dévant c'menchi l's affaires dé l'Assembliée, le Président annoncyit qué dépis not' dernière rêunion mensuelle, au mais d'Décembre, j'avions pèrdu deux d'nos membres.

 

Lé preunmyi fut Moussieu John du Val, dé La Caroline, St. Pierre, membre honoré et estimé dé not' Assembliée. Lé deuxième, pus récemment, fut lé Sieur Geo. Noël - membre fondateur, qui suivait fidèlement lé progrés dé nos rêunions.

 

Comme tribut affectueux, lé Sieur Billot d'mandit ès membres dé sé l'ver, en silence, pour eune minute, à lus mémouaire.

 

La Sécrétaire avait erchu des cartes du Sieur Geo. Le Feuvre, dé l'Amérique; dé Moussieu Réné Etienne (Association d'Etudes Normandes), dé Rouen, et dé Moussieu Marcel Rieunier (Bibliothèque Nationale dé Paris), exprimant lus bouans voeux pour lé succès et l'avanchement dé not' Assembliée.

 

I'y eut huit nouvieaux membres d'êlus, à chutte Rêunion.

 

Divèrtissements.

 

Lé Sieur J. W. Le Breton avait collecté eune mâsse dé tchestchons pour vaie si les membres pouvaient d'viner les rêponses. I' fallait bein connaître les vielles expressions, et les touos vièrs mots Jèrriais, dévant gangner deux points! Les gens des deux groupes - à drouaite et à gauche, 'taient bein animés, et travaillîtent du! pour s'entre battre. N'ou les félicite sus lus intélligence et lus mémouaire.

 

Entre les bordées d'tchestchons, j'eûmes lé plaisi d'entendre eune récitation par lé Sieur Philip Sarre - “Ma courte pipe”, - par Ch'la s'peut.

 

Ensuite, “Lé Miyeu jour dé ma vie,” par Eileen Le Sueur, qui nos racontit ses expériences quand ou fut d'mandée d'erprésenter Jèrri à Londres, pour la télévision. Et pour fini, eune chanson originale, en Jèrriais, par lé Sieur J. W. Le Breton, et composée par li-même.

 

Ermèrciements.

 

Lé Sieur Chas. Billot ermèrcyit lé Sieur Le Breton pour tout son travâs d'préparation d'tchestchions; Mlle K. Le Boutillier pour aver gardé conte des points gagnis; lé Sieur Philip Sarre et Mme Eileen Le Sueur pour lus r'cits intéressants.

 

Il annoncyit qué la préchaine réunion érait lieu lé 29 dé Mars, et la rêunion fut ajournée dé viers d'giex heures.