1931: La lettre de Maît' Cliément d'Caen

 La lettre de Maît' Cliément d'Caen qui pathu dans chute colonne ichin i'y a tchinze jours a 'té si distchutée et crititchie par mes lecteurs et i'y ieu tant d'opinions d'exprimées sus la position que l'Chef m'a chergi de faithe un articlye sus l'même sujet et de faithe part à nos lecteurs tch'est qu'est man opinion personnelle sus tout chenna.

 

Ch'est bain aimablye de la part du Chef, sustout comme i' sait bain que mes veues sont absolument en opposition ès siennes. J'avons ieu bain des distchussions sus l'Projet prépathé par le Comité pour l'Agritchultuthe sus l'attitude des fermiers et sus les théories des difféthents membres d's Etats et i'y a bain p'tit d'points sus tchi que j'pouvons tomber d'accord.

 

Je n'sais pas l'tchèl des deux qui connaît l'pus dans la fermethie, je crains bain que j'n'y connaissons pas grand chose, ni l'un ni l'autre, ch'est pour chenna que, comme bain d'autres de not'e calibre, je posons comme des autoritès bain renseignies sus l'sujet.

 

Ah ça, quant au micologiste, je n'crai pas que les fermiers qu'étaient si opposés à s'n appointement avaient raison, et lus attitude devait paraître, au public en général, des pus incompréhensiblyes, sustout comme che s'sait à lus intéthêt tout partichulyi qu'un r'miède sait dêcouvert pour faithe dispathaître la maladie dans les patates.

 

Mais de chein que j'en comprends, quoique i'sont tous bain anxieux de trouver une solution au problème, ils êprouvent une certaine crainte de confier lus destinées entre les mains d'un inconnu scientifique qui à tort ou à raison, aithait l'pouvé d'influencer le Comité d'Agritchultuthe à passer des régliements qui les contiendrait à suivre ses théories et ses caprices dans la manièthe de tchultiver lus récoltes et que finalement i'ne s'saient pus maîtres siez-ieux.

 

Mais, selon man point d'veue, ch'est une manièthe bain trop exaggethée d'envisagi la position.

 

Je n'crai pas que nos fermiers ont rain à craindre par l'appointement d'un homme de science pour venin ichin pour faithe une êtude de la maladie dans les patates. Au contraithe i'm'semblye qu'i' trouvethont en li un homme sympathique, qui s'interes'sa à prendre connaissance du rêsultat de lus expériments et qui sus lus invitation se f'tha un pliaîsi de visiteur lus fermes et de vaie pour li-même l'effet du sprayage ou du non-sprayage et en tither ses conclusions opprès en aveu veu une démonstration pratique.

 

A la pliaiche de le r'garder comme un homme dangereux à lus intéthêts et de l'traiter avec mêfiance i' dév'thaient considéther que san seul but et de lus v'nin en aide et de li donner toutes les facilités en lus prouvé pour mener ses recherches à la réussite.

 

Au sujet du Projet d'Louai qui vint devant l's Etats l'aut'e jour et qui, par une majorité, fut renvié à l'êtude du Comité, iunne des causes principales de l'opposition de la part de nos fermiers était le pouvé donné à un seul Inspecteur d'ordonner le sulfatage nécessaithe pour brûler les vignes dans des cas extrêmes de maladie.

 

Eh bain ichin ettou i'lus sont fait peux inutilement.

 

Si un Inspecteur est digne de s'n appointement et est à la hauteur de sa mission i' dait aver assez d'jugement pour agi avec circonspection et i'n's'en va pas à tithe larigo faithe brûler les recoltes es fermiers.

 

Le bouan sens s'impose oquothe au but d'tout!

 

Ergardez combain qu'i' y a d'administrations dans l'île qui donnent un pouvé absolu à un seul homme.

 

Prenons d'abord Moussieu le Juge de la P'tite Cour. Si j'avais une dispute sérieuse avec le Chef ou si dans un moment d'colèthe que j'assomethais Marie Hibou je s'sais présenté en Justice et un seul homme aithait l'pouvé de m'fliantchi un mais d'prîson.

 

Et i' n'y a pas d'appel contre son jugement.

 

Si un fermi porte un lard à l'abbattoir et qu'il a deustrais rouoges taques sus la couenne qui font craithe au vétérinaithe que l'anima avait une maladie tchelconque, chu fonctionnaithe-là à l'drouait de l'confistchi.

 

Et l'fermi n'a rain à dithe!

 

Pour citer un autre cas.

 

L'Inspecteur des Marchiers n'a qu'à trouver du paisson offert en vente, qui n'est pas propre pour la consommation, il est auotrisé d'en ordonner la confiscation.

 

Si votre tchan mord autchune personne et que chute personne-là s'en pliaint au Connaîtablye, ch't office-là peut ordonner la destruction de votre tou-tou comme étant un anima dangereux et ous avez biau protester i'n'y a autchun appel contre la sentence.

 

V'là don un nombre d'cas iou que la décision finale dêpend d'un seul homme, et nou pouorrait en citer bain d'autres. Il est bain rare de constater autchun cas ouest qu'ches fonctionnaithes-là aient abusé d'lus pouvoirs, alors pourtchi faithe un 'té traîn contre les Inspecteurs des patates. V'là tchiques années qu'i' sont en office et s'i' y a autchune plainte à faithe à lus êgard ch'est que dans bain des cas ils ont 'té maintchi trop indulgents envers les délinquents.

 

Et malgré tout chein qui peut être dit au contraithe i' n'y aithait autchun dangi à passer ches articlyes-là du projet malgré lus sévéthité, car oulle est pus appathente que réelle.

 

Caouain

1931