1959: Le Chantgni et la charmante fille.

 Le Chantgni et la charmante fille.

 

Moussieu l'Editeu,

 

Je n'sais vraiement pas tchèsque la Merrienne avait quand ou s'mint dans la tête de vos êcrithe la s'maine pâssée, et je n'l'ai pas ocquo pardonnée pour avé suggéthé que j'avais attrapé un coup d'solé dans la bârre au Show d'la Ville. Il est vrai que j'trouvit deus-trais d'mes viers amins là, mais ch'n'est pas yun ou deux p'tits vêrres tchi s'en vont faithe le Ph'lip du Portinfé crôlé sûs ses gambes. Ch'est oublié pour ach'teu, Moussieu, mais attendez qu'ou veinne se pliaindre de tchique ma tchiquebord et j'l'y dêmontrethai qu'une femme tch'a un mio d'avis n'dév'thait pas s'fichi d'san bouonhomme quand y n'se trouve pas trop raide.

 

Hieu au sé, Moussieu, quand oulle eut fini d'lièthe la gâzétte, ou l'a fliantchit dans l'graie. J'la ramâssit et j'vit bein vite l'articlye tchi l'avait minse en colèthe et y faut dithe que quand j'l'eut liut à man tou, j'éthais 'tait content d'capuchi la Post sûs l'haut d'la tête avec ma chouque.

 

Pûs d'une fais dérnièthement nous a veu qu'ou voudrait vais notre vier système de Police Honorifique aboli dans la pâraisse de Saint-Hélier, mais chu coup ch'tait une attaque sûs deux d'nos bouons Chantgniers de Campagne. Yun d'yeux, l'Edgar Mouothant, d'la Trin'té, avait 'tait app'lé au Bouolai, ouèsque y'avait yeu un accident. Une jeune fille tch'y d'vallait l'mont avec tchiques amins dans san môteur, criyant qu'san brake pouorrait donné en appréchant un mauvais dêtou dans l'mont, avait cachi dans l'fôssé, sans faithe de ma à pérsonne. Edgar, un jeune homme tch'a l'tchoeu bein tendre et tch'a 'tait longtemps assez à la Trin'té pour apprécié une charmante fille, fit chein qu'j'éthais fait, Moussieu, et sans doute vous étout. Y n'print autchune action, et la Post voulait dithe que s'il avait fait san d'vé, il éthait au mains envié en Ville pour des experts tch'éthaient peut vais si l'brake d'la machine 'tait ou n'tait pas en ordre.

 

Y y'a une autre chose tchi nos intérêssie, la Merrienne et mé. Ch'est chein que notre Juge d'la P'tite Cour a dit au sujét de deux accidents fatales, yun ichin à Saint-Ou, et l'autre sûs l'Av'nue Victoria. Accordant au rapport sûs la gâzétte, un homme tchi cache un môteur à chinquante milles à l'heuthe, ne cache pas trop vite, mais y cache dang'reusement. Je sommes un vier couplye tch'y n'ont pas yeu grande êducation, et tch'y n'ont p't'être pas hardi d'intélligence, mais franchement, je n'comprenons pas tchèsque le Sieur Vouaisin veur dithe. Sans doute, y pouorrait explitchi, mais je n'criyons pas qu'ch'est la peine d'allé l'vais pour savé si j'sommes si bêtes que je n'pouvons pas en faithe du bouonsens. Mais pâslant d'accidents, ch'est seux, et j'l'ai dit bein des fais, que si nous abat une pérsonne sûs la route, ch'est bien mûs d'en faithe une djobbe pour l'entrepreneux et d'en êcappé pour djais louis, que d'l'y rompie une gambe ou un bras, même deus-trais côtes et d'avé à péyi des chents louis pour les docteurs, pour l'hôpita, et chein qu'la Cour accorde d'extra à la victime.

 

Hier ocquo, sûs l'Av'nue Victoria, un môteur êcrasit un pouôrre p'tit tchan tchi n'faisait pas d'ma à pérsonne. La s'maine tchi veint, ch'pouôrrait être un p'tit êfant, mais y faut tréjous se r'souv'nin que chiquante milles à l'heuthe dans chutte route-là n'est pas trop vite!

 

La Merrienne a 'tait bein lâssée tout l'jour, car ou fut à la fête à Saint-Louothains, ouèsqu'ou vit touos ses couosins. Ou dit que y'avait hardi à admithé, mais étout trop d'chais hardélles avec prèsque rain sûs l'co. “J'en avait honte,” ou s'fit. “Tchèsque tu'éthais dit, Ph'lip, si, quand j'tais jeune, tu m'avais veue en pliein jour, à parcouothi la pâraisse prèsque d's'habillyie?”

 

J'éthais peut dithe bein des choses, Moussieu, mais j'eut l'avis de m'taithe. J'peux vos dithe que chein tchi m'vint dans l'idée n'éthait pas pliut la Merrienne. Je crais qu'elle vint à vais tout-d'suite qu'ou n'éthait pas deu m'pôsé chutte tchèstchon-là, car ou changit l'sujét et s'mint à pâslé du prix des tomates, du dérnié scandale à la Ville Bagot et du fermyi d'Sainte-Mathie qu'avait envié pour le vétérinaithe quand sa femme avait 'tait prinse d'une colique. En finissant, ou dit qu'oulle éspethait que dans p'tit d'temps j'éthions tchiques bouonnes achies pour rafraichi san gardin et remplyi les réservoirs.

 

Ph'lip.

1959