1949: Ph'lip Digs His Early Patch

 Ph'lip Digs His Early Patch

 

Moussieu l'Editeu,

 

J'ai tchiquechose à vos raconté, et y faut que j'vos diche que je n's'y pas content. Ecoutez que j'vos explique.

 

En drièthe d'la maison y'a un bétchet d'un doûzaine de pérques que j'avais plianté en patates de bouonne heuthe.

 

Ach'teu y s'adonnit qu'Lundi au sé, la Merrienne, tch'avait tait l'vais, chu bétchet, et tch'avait digoté ichin et là, m'dit en soupant qu'les patates taient bouonnes à fouï. "Y n'faut pas s'attendre tchi f'thont pûs d'un chent la pérque," ou dit, "mais au prix tchi sont y paiethont."

 

En Êlection

 En Êlection.

 

Par A.L.P.

 

 

Charactéthes.

 

 

• Le Député Laiesse Poudret                    Candidat pour Connêtablye.
• Râchel Poudret                                                 Sa femme.
• Lise Poudret                                                     Lus fille.
• Tom Le Brun                )                                   Deux pârouaissiens du contre parti.
• Charles Verdon             )                                  
• Le Chent'nyi George Ernon

 

Scène

 

L'année 1900.

 

La tchuisine siez Laiesse Poudret, à 2 heuthes du matin la niet dévant l'éléction. L'apartement est êluminée par la cliarté d'la ieune, deux hoummes entrent par la f'nêtre; ch'est Tom Le Brun et Charles Verdon. Ils ont un grand portrait auvec ieux.

 

Charles                 Va douochement don, pourre bachouard!

 

Tom                     Ah ch'est bein! --- Semnage, nou n'y vait chin-terre, as-tu chutte chandelle la?

 

Charles                 Oui.

 

Tom                     Allume la don, ou j'allons nos trebutchi sus tchique chose.

 

                            (Charles qu'a mins le portrait sus eune tchaise allume eune chandelle et ergarde iou qu'i' peut la mettre).

 

Tom                     Man bouanhomme, ergarde-mé les boutelles, ch'est d'tchi bouan! Ma fé en v'chin eune viède, mâte la chandelle dans l'co et j'y vèrrons mus.

 

                            (I' mettent la chandelle dans l'co d'la boutelle).

 

Charles                 Pooh, i' n'dait pas y'aver de purchons ichin d'dans valet! Sents tu la fumée d'cigarre? J'ai deux autres chandelles, ch'est d'les allumer. (Ils allument les chandelles). A-ch't-heu ch'est d'nos y mettre. Iou qu'j'allons c'menchi?

 

Les Neûches d'Or à Ph'lip et Mèrgot

 Lettre Jerriaise Samedi l'13 d'Août 2005.

Les Neûches d'Or à Ph'lip et Mèrgot.

 

Couomme d'habitude ch'est un pliaisi pour mé Clifford Laisney, d'vos addrechi, et aniet j'voudrais vous raconter une sornette que j'avaits écrit depis tchique années. Ou s'appelle, 'LES NEUCHES D'OR A PH'LIP ET MERGOT'.

 

Samedi l'14 de Fevri 1948 (jour de St Valentin) fut l'occasion des neûches de nos grands anmins Ph'lip et Mèrgot Hacou, et d'même suivants chinquante années de revers d'la vie, ch'tait auve grand pliaisi que j'les joignimes dans les célebrations d'lûs neûches d'or.

 

Le Ph'lip n'est pas la sorte de gas tch'organise les choses a miè-m'suthe, et d'même il avait chouaisi seulement l'meilleu pour sa Mèrgot, La Grand Hotel a West Park. Les invitations avaits 'tait postées au mins siez s'm'naines d'avanche, le menu avait 'tait bein considethé, et ils avaient decider que chinquante années d'mathiage et d'heutheusté auve sa Mèrgot methitait une celebration de grande manniethe.

 

Lettre Jerriaise Samedi l'16 d'Avri 2005

 Lettre Jerriaise Samedi l'16 d'Avri 2005.

 

Couomme d'amors, ch'est un pliaisi pour mé, Clifford Laisney d'vos addrechi aniet l16 d'Avri 2005 auve mes pensées sus l's'evenements des dreines semaines.

 

Quouaiq'u nous s'i'attendait, suivant les bull'tins sus l'radio, la television et les gazettes, ch'tait quand meme auve sympâthie que j'entendimes les nouvelles du 2 d'Avri announcant que l'Pape Jean Paul IIième avait trépasser a l'éternité.

 

Né dans son pays d'Polande, i 'tait hardi respecté d'son peuplye, et l'examplye tch'il a exprinmer au monde sans r'gard de religion, vivra couomme testament a son couôthage et sincerité pour bein des décades a l'av'nin.

 

Nou n'peut selon felicité l'eglyise de Rome et l'Gouvernment pour lus expertise d'organisé les arrangements nécessaithe pour la suth'té et l'soignage des foules tchi descendites sus l'Vatican et L'capita Rome duthant les jours menant a l'enterrement. Ch'tait vraiment touchant etou d'vaie Rouais, Présidents, Princes et Membres du Publique s'entre offrant la main en acte de paix duthant l'service.