Monday 3 August 2015

Un but d'la Bibl'ye - Bible snippet

Sieaume 97:

Psalm 97:


Channel Islands viewed from ISS in 2012
Le Seigneu est l'Rouai, qu'la tèrre s'en rêjouisse! Véthe, qué l'êtrueûlée d'îles s'en rêjouisse! Tout l'tou d'li y'a des nouages et d'la nièrcheu; san trône est jutchi sus la justice et l'jugement. Eune brûl'lie îtha l'avant à li tchi brûl'la ses enn'mîns par touos les bords. Ses êparts dé feu êcliaithent lé monde; la tèrre les a veu et en a ieu peux. Les monts ont fondu coumme d'la chithe dans la présence du Seigneu; dans la présence du Seigneu d'la tèrre entchiéthe. Les cieux ont procliâmé sa justice, et tout l'peupl'ye ont veu sa glouaithe. Qu'les cheins tchi louangent des êpitafl'yes et tch'honothent des êmânues saient morfondus; louangiz-lé, touos vous l's êmânues! Sion l'a ouï et s'en est rêjoui; et les fil'yes dé Judâ ont 'té heutheuses par cause dé tes jugements, oh Seigneu. Ch'est en tchi, Seigneu, tu'es pus haut qué touos les cheins sus la tèrre; tu'es glorifié bein pus haut qu'les êmânues. Vous tch'aimez l'Seigneu, dêtestez la maûvaîtchi; lé Seigneu sauve les âmes dé ses saints, i' les libéth'tha d'la main du malîn. Eune leunmiéthe a géthi pouor les justes, et d'la jouaie pouor les fidèles dans l'tchoeu. Rêjouiss'-ous dans l'Seigneu, vous les justes, et r'mèrciez san saint nom!

No comments: