L'Embarras Du Chouaix

 L'Embarras Du Chouaix

 

• Gladys Desperques                                           
• Blanche Lêcaudey

La Tchuisine à Miss Lêcaudey

 

(Blanche est assise à couôtre quand Gladys entre toute excitée).

 

Glad.                    Tch'est qu'tu t'en vas faithe té, Blanche?

 

Blan.                    Oh mais, tu m'fais quâsi peux! Faithe tchi? Tch'est qu'i y'a?

 

Glad.                    Mais pour l'êlection pour Député! Sont-i' v'nus té d'mander ta vouaix? J'espethe que tu t'en vas voter d'not-e bord!

 

Blan.                    (bain trantchillement). Nennin, j'n'ai pas ocouo veu personne. La vielle Jane Snichon à êprouvé à m'pómper un mio en r'venant d'la ville ch'tte arlévée dans la bus, mais je m'sis bain gardée de satisfaithe sa tchuthiosité. Tu m'pâles de “votre bord”, mais tu n'm'as pas dit tchi bord! Pour tchi qu'tu vôtes, té?

 

Glad.                    Eh bain en v'la eune tchestion! Pour Tom Grapin, sans doute! Crai-tu que j'vot'tais pour ch't autre apôtre là? Jamais i'n' vaindrai Député quand i'y êprouvethai toute sa vie!

 

Blan.                    Je n'voudrais pas en dithe autant. Nou m'disait annièt que ch'est li qui s'en va y v'nin, les Pilebos, la fanmille Trépid et touos les Merlus sont pour li, il a la pus grande partie de la Vingtaine des Grandes Banques de san bord et i' pathait que ch'est l'Député actuel qui s'en va l'proposer. Chonna s'en va li valer pus d'chinquante vouaix!

 

Glad.                    [Tchi tas d'niolin!] Les élécteurs né s'en vont pas être si bêtes! V'là un ouainé qu'était en faveur de l'Income Tax et qui trouvait que Jèrri dev'thait payi bain pus au Gouvernement Angliais. Il est d'cheux la qui voudraient faithe les fermiers payi à la pliaiche de faithe lus c'mins ieux mêmes! Tout pour la dêpense! J'en avons pourtant bain assez d'chute sorte-là dans l's Etats!

 

Blan.                    J'admets bain tout ch'la Gladys, mais tu n'peux sinon admettre qu'il a pus d'êducation et est pus capablye de faithe un discours que tan Grapin!

 

Glad.                    Man Grapin? En v'la ettou! Man Grapin coumme tu l'appelles n'a jamais 'té mins à l'amende pour aver monté du vrèt le Dinmanche la niét! Et i' n'a pas rompu les gambes à personne avec sa motor bike.

 

Blan.                    Nan, car i'n'a jamais ieu l'moyen d'en acater ieune. Mais ma pouorre fille, tch'est qu'tout chu d'vis là sert? Pourtchi que toutes les fais qu'i y'a eune êlection que nou prend san pliaisi à dênigrer l'autre candidat et ramener toutes sortes d'choses de dans san passé.

 

Glad.                    Parce que des gens qui n'sont pas absolument iréprochablyes ne dev'thaient pas prendre d'postes. Je n'sais pas si tu t'en vas voter pour Davi Gobetout mais as-tu oui chein qu'les gens disent entouor san grandpéthe?

 

Blan.                    Eh bein par examplye! s'i' faut ramener san grandpéthe.

 

Glad.                    Eh bein mais v'la! Pepée m'disait que le bouanhoumme avait trèjous des joudgies d'litcheu siez li sus tchi qu'l'Impot n'avait jamais té payi!

 

Blan.                    Et j'crai bein qu'i y'en avait d'autres coumme li dans ches temps la. Mais je n'vai pas coumment qu'lé vyi peut aver à raipondre pour les faits d'ses anchêtres. A t'oui pâler nou dithait qu'tan Grapin est un modèle de perfection li. I'm'semblye pourtant aver oui tchique histouaithe entouor.

 

Glad.                    En v'la assez! Je sais bein tch'est qu'tu t'en vas dithe. J'm'attends bein qu'i y'a des gens qui s'sont mêchants assez pour ramener ch'tte affaithe la, mai ma tante m'a raconté la chose et ou souôchaint que le ch'tat tout d'la faute à ses gens. Mais ch'n'est pas tout chenns. Ch'n'est pas la peine d'aver du brit pas sus eune malheutheuse êlection! Pour le tchèt qu'tu t'en vas voter?

 

Blan.                    Je n'sais pas. Je m'm'en vais pas faithe de promesses. Je sis à même de n'voter pas du tout. Je m'en vais, être êloudrée touos les jours par les deux bords, et tout chenna m'embête. Oh pourtchi qu'nous à donné vouaix ès femmes. Nos grandmèthes étaient bein pus trantchilles et n'avaient pas tout ch't embarrass-là.

 

Glad.                    [Bein] fait coumme mé, vote pour le gagnant!  VIVE GRAPIN!