1967: D'èrtou en Jèrri!

 D'èrtou en Jèrri!

 

 

Le Ménage ès Feuvres,

St. Ouën.

 

Lé 3 d'juin, 1967.

 

 

Moussieu l'Rédacteu,

 

M'èrvéla en Jèrri! Dans sa poësie “Rafales dé d'Siez Nous”, tchi m'fut dêdiée dans l'Bulletin neunmétho dgix d'L'Assembliée d'Jèrriais en 1955, Laïesse des Geonnais m'dîsait :-

 

Oh! qu'j'aim'thais r'vaie siez nous.

En Jèrri, l'êrnouvé …

Les g'zettes et l'bliu coucou

En avri, au solé;

Et quand, pus tard, étout

Nou-s-èst au bieau mais d'mai …

 

J'm'arrête-là - pour mé donner l'temps d'èrgarder pour chu bieau mais d'mai! Dépis m'n arrivée i' n'y a ieu qué d's achies d'plyie touos les jours! Et pourtant, quand j'tais en Améthique y'a tchînze jours j'dîsais à iun d'mes fréthes, “Il est grand temps qué j'm'en âge en Jèrri quandi qué j'sommes dans l'mais d'mai : Ch'est iun des pus bieaux et doux mais d'l'année dans l'Île!” Enfin, nou n'peut pon ordonner ni contrôller l'temps. Ch'est l'temps du Bouan Dgieu, comme disaient l's anciens, mais ch'n'est pon tréjous San miyeu tch'I' nouos donne. En fîn d'compte, ch'est bouan d'êt' en vie et d'joui des s'maines, des mais et des saisons comme lé Bouan Dgieu nouos l's env'yient, et d'faithe san d'ver dans l'êtat où-est tch'I' Li pliaît d'nouos appeler, comme i' nouos est dit dans l'Catéchisme!

 

Dinmanche passé j'tais à l'Églyise dé St. George où-est qué j'fus bâptîsi au mais d'octobre, 1891, par lé défunt Révérend Moussieu Pépîn, et où-est qu'j'allis à l'Êcole du Dînmanche jusqu'à 1903. Man papa mouothit ch't-année-là et j'm'en fus d'meuther à La Mouaie à St. Brélade siez ma tante et marraine, Missis Fraînque d'Aubert, née Ann Georgina Le Feuvre, la soeu d'man p'pèe.

 

Au sèrvice dans l'églyise, Dînmanche, j'n'y viyais pon d'gens tch'étaient là dans ma jannèche sénon Moussieu et Madanme Fraînque Hâcou et Madanme Juge Lé Boutilyi. Appathemment la grand' partie des cheins tch'étaient là quand j'tais mousse sont au Paradis, et les cheins tchi sont acouo du rang des vivants sont houors pâraisse ou n'vont pus à l'églyise. Y'a quand-mème eune charmante ancienne tchi d'vait y aller d'vant qué j'fusse né tch'était là. Ch'tait Madanme Veuve George J'valyi, née Mary Ann Vibert. Ou' dêpasse nénante ans et va acouo à pid à St. George touos les Dînmanche. Tchi bel exempl'ye d'fidelité pour touos nous! J'tais à l'Êcole Wesleyenne dé St. Ouën en mème temps qu'san couôsîn John Le Héron, tch'est à La Côte dépis 1908, et ou' mé d'mande tréjous d'ses nouvelles. Il est r'tithé à ch't heu et d'meuthe à Montréal, et j'passis eune séthée siez-li y'a trais ans.

 

En r'gardant l'tou d'l'églyise j'viyais les pliaques à la mémouaithe des vièrs sèrviteurs tch'étaient dévôts dans san sèrvice pour bein d's années et qué j'connaissais dans ma jannèche, entr'autres, Moussieu Francis Philippe Hâcou, pilyi d'l'églyise et Connêtabl'ye d'St. Ouën, Elie Maugi, Seurvilyant d'l'Êcole du Dinmanche et maître d'la preunmié classe, et Moussieu Pépîn, Recteur, tchi m'bâptîsit. Et j'pensais ès matinnées dans l'églyise tchi m'pathaîssaient si longues quand j'tais mousse à l'Êcole du Dinmanche, sustout quand ch'tait La Litanie dans tchi tch'i' m'sembliait tch'i' y'avait au mains eune chentaine dé vèrsets tchi c'menchaient par “Qu'il te plaise” et par “Nous te supplions!” Et les sèrmons m'pathaîssaient n'en finni janmais! Et j'pensais à Maît' Tanminne Le Cornu, l'organiste. I' m'sembliait acouo vaie sa tête faithe des saluts tchi gardaient l'temps auve ses pids quand il avait à pomper en poussant la pliataine au bas d'l'orgue! Dans chu temps-là ch'tait eune corvée pour un mousse dé s'garder trantchil tout l'travèrs du sèrvice, et i' fallait l'faithe car nou-s-avait peux qu'les pathents ouïssent qué nou-s-avait 'té mêchants dans La Maison du Bouan Dgieu!

 

Hélas! Où-est tchi sont houors, ches bouans vièrs temps-là d'eune jannèche tchi s'est passée si vite? V'la tchi m'fait penser au chent-dgiexième psaume, tchi nouos dit qu'les jours dé nouos années r'veinnent à septante ans, et s'i' y'en a d'vigouotheux à huiptante, mème lé pus bé d'ses jours n'est qu'travas et tormente et i' s'en va beintôt, et nous j'nouos envolons! Sont-i' à propos, man bouanhomme, les psaumes, quand nou veint à considéther!

 

Et j'pensais ès cheins qué j'viyais acouo en plienne vie l'année passée et tch'ont passé l'pas dreinement dévant qué j'vînsse - lé bouanhomme Maît' Ph'lippe Gallienne, Maît' Wilfred Betchet, lé p'pèe à m'n homme d'affaithes, l'êcrivain “Ted” Le Gresley, l'ex-Sénateu Carlyle Le Gallais, entr'autres, et v'la tchi m'ramémouaithe qué l'nombre d'mes vièrs anmîns Jèrriais rap'tiche touos l's ans!

 

Enfin, j'sis bein content d'pouver vaie la mé battre san pliein à L'Êta, et d'pouver acouo marchi les routes lé tou des Landes où-est qu'mes anchêtres ont cèrtainement aidgi à bâti les muthâles et les fossés dans l'temps jadis, et d'y rencontrer acouo des gens auve tchi nou peut pâler dans la belle vielle langue dé nouos anchêtres. Malheuseuthement, ch'est triste dé penser qu'chest dans la contrée qu'ou mouôrra, chutte vielle langue, mais à châque jour suffit sa peine!

 

George d'La Forge.