1967: La Forge

 La Forge

 

                               Le Ménage ès Feuvres.

St. Ouen.

 

Lé 27 mai, 1967.

 

 

Moussieu l'Rédacteu,

 

Quand j'tais mousse siez papa a La Forge, i' m'env'yait tchiquefais ès Landes siez Mess Maugi. Laïesse, lé cordonn'yi, qu'si d'la bra pour mett' sus des copes. Dans des temps, quand papa 'tait à féther un j'va, lé j'va bouogeait quandi tch'il 'tait à dréchi l'chabot et i' s'copait la main ou les dés atout l'couté à corne. I' n'y avait pon miyeu qué d'la bra pour garder la cope freunmée et la r'faithe. En attendant pour i' fallait êtantchi l'sang atout d's ithangnies ou un tchâs dé p'tun. Ch'est r'mèrquabl'ye comme la cope s'èrfaisait vite un co couverte d'bra!

 

Sav'ous, bouannes gens, comment en faithe, d'la bra? Eh bein, ouaithe qué y'a quâsi septante ans dépis l'temps qué j'tais mousse à La Forge, jé n'lé savais pon mé-mème dévant ouvri man dictionnaithe Jèrriais à ces sé. I' s'adonne qué quand j'ai eune munute dé laisi, j'l'ouvre a autcheune page, sachant tch'i' y'a d'tchi intérêssant à liéthe dans toutes. À la page souoxante-neu ou' vèrrez qué la bra est faite atout d'l'hielle dé mouothue et d'la rôsinne!

 

Ch'tait un bouan vièr corps, lé bouanhomme Laïesse Maugi. Il 'tait Surintendant d'l'École du Dinmanche, et maître d'la preunmié classe, à l'églyise dé St. George. Comme cordonn'yi i' n'y avait pon à l'battre. Et il 'tait d'bouan tchoeu. Janmais i' n'éthait prins un sou pour la bra tch'i' donnait à papa ou a autcheune aut'pèrsonne tch'avait l'malheur dé s'coper. S'ou-s-avez connu san fis Alfred, dans san vivant Inspecteux du Marchi en ville et Seurvillant d'l'églyise parouissiale dé St. Ouën pour bein d's années, ou-s-êthez veu san p'pèe, car i' li r'sembliant comme deux d'goûts dg'ieau, moustache et toute la pêque!

 

J'y pense souvent, à ches bouans vièrs jours-là dans la forge. J'aimais bein vaie papa et man p'pée féther les j'vaux. I' m'sembl'ye qué j'sens acouo l'brulîn d'la corne quand i' m'ttaient l'fé caud sus l'chabot pour l'apprêter bein dévant l'èrfraidgi et l'cliouer. Et les tchians des fermièrs et du vaisinné aimaient, à miâtchi les mios d'corne tch'étaient copés du chabot! Tchiquefais, l'fèrmyi tch'am'nait san j'va restait dans la forge à bailli d'sa becque a papa en attendant tch'i' fûsse féthé, et la convèrsâtion 'tait souvent entouôrre La Côte. Prèsque toutes les fanmiles dé chu temps-la y'avaient 'té, ou avaient des fis là-bas, et papa y'avait 'té li-mème dévant s'mathier et s'mett' à forgi à tèrre en Jèrri.

 

J'éthais det êt' forgeux, l'mêtchi d'man p'pèe, d'man papa et d'hardi d'pus anchêtres, et quand j'tais dans la forge i' m'sembliait tch'i' n'y avait pon autcheun aut' mêtchi au monde comme ch'tî-la. Lé son du marté sus l'enclieunme 'tait d'la mûsique à mes ouïes, et au sé dans l'hiver quand man p'pèe et papa travaillaient tard à faithe des fièrs dé tchéthues, l'son des gros martchieaux - réglié par lé p'tit marté à papa tchi gardait l'temps parfaitement entre chaque coup - 'tait l'son du gros tambour dé la mûsique! Quand i' fallait tchitter à frapper, lé p'tit marté donnait deux coups d'siette sus l'enclieunme.

 

Manman m'enfliubait bein ches séthées-là, et papa m'assiévait dans l'empliaichement du feu tchi n'tait pon d'sèrvice pour la séthée. Y'avait deux feux souos la votte et la cheunm'née du fouoyi, mais comme i' n'y avait qu'eune pâthe de gros sûffliets, lé deuxième feu n'faisait pon sèrvi souvent. J'êprouvais à soûffier pour papa et man p'pèe, mais jé l's embêtais pus qué d'lus aidgi viyant qué j'tais trop p'tit pour aveindre lé bras des soûffliets quand i' m'êcappait et tch'il' 'tait en l'air!

 

Papa 'tait fanmeux à tremper d's ôtis. Y'avait eune toube plieinne dg'iaeu souos l'fouoyi, et i' m'sembl'ye qué j'lé vai acouo haler l's ôtis du feu, touos rouoges et pétillants, et les fouôrrer dans la toube pour tchiques ségondes et pis les r'haler dêliément et les mett' quâsi au but d'san nez! J'mé d'mandais si ch'tait pour les senti, mais j'pense qué ch'tait pour vêrifier la couleu d'la trempe, et comme i' viyait d'près i' fallait l's appréchi près d'sa veue. Dans des temps ch'tait dans eune pétite toubée d'huile tch'i' les trempait.

 

Ch'tait intérêssant à vaie l's objets qu'les vaisins apportaient a la forge pour êt' êrgraient. Toutes sortes d'choses en blianc fe comme des boutchets, pour êt' sodés. Mème des machinnes a pédaller tchi 'taient en dêroute 'taient am'nées à papa. Les jouets ès mousses étout. Il 'tait tréjous à soder lus cèrcl'yes, et i' n'lus chèrgeait pon rein pour sa peine - mais i' les r'primandait s'i' n'disaient pon “Mércie!”

 

Ch'est bein seux tch'i' n'éthait janmais fait forteune à forgi, l'pouôrre vièr papa. I' mouothis pauvre, mais fyi tch'i' né d'vait à pérsonne! Il 'tait d'trop bouan tchoeu, et y'avait trop d'crédit. L'fèrmyi du temps passé payait eune fais par an - quand i' r'chévait pour ses patates. Dans l'entrétemps, papa n'pouvait pon acater san fé et s'n acyi à crédit - i' fallait payi pour et à m'suthe. Si l'pouôrre dgiâtre d'fèrmyi n'faisait rein sus ses patates et tch'i' n'pouvait pon payi san compte, papa éthait 'té l'drein homme au monde à li-env'yer bille!

 

 

George d'La Forge.