1966: Eune sethée y'a chent ans

 Eune sethée y'a chent ans

 

Fort Lauderdale, Florida

U.S.A.

 

Lé 16 d'avri, 1966.

 

 

Moussieu l'Rédacteu,

 

Comme j'l'ai mentionné d'vant, man papa et trais d'ses frèthes, Jean, Charles et Françouais - touos nés entre 1828 et 1845 - 'taient tous à La Côte en mème temps. Papa restit en Jèrri eune fais mathié et suivit sa vocation d'forgeux. Charles s'en r'vînt en Jèrri prendre souain d'sa m'mèe (Elizabeth Le Brun, 1806-1895) et du mènage quand san p'pèe, Jean Thomas (1804-1873), mouothit. Jean fut n'yé à la pêque dé la mouothue à La Côte, et Françouais fut tué accidentellement houors-pays.

 

L'êté passé, quand j'tais en Jèrri et qué j'tais à r'garder l'âtre dans l'Ménage ès Feuvres à St. Ouën, i' m'sembliait pour tchiques munutes qué j'pouvais envisagi l'grand-grand-pèthe Jean Thomas assis d'un côté d'l'âtre, et la grand-grand-mèthe assise dé l'aut' côté atout sa couaiffe sus sa tête (comme j'la viyais quand j'avais trais ou quatre ans) et sa potée dé s'no à côté d'lyi, eune séthée d'hiver y'a chent ans ou pus, quand lus garçons 'taient à La Côte. J'pouvais, étout, m'înmaginner qué j'ouïyais l'bouanhomme Jean Thomas dithe: “Y'a un chapé au crâsset, Lisabé - j'allons vaie tchitchun!” Tchiques munutes auprés, y'a eune tape à la porte. “Là! Tch'est qué j'té disais, Lisabé. Y'a tchitchun à l'us. Entrez! Bon! Ch'est té, Ph`lippe! Tu-es l'beinv'nu, man garçon!"

 

"Bonsouair, Maît' Ph'lippe!”, s'fît Lisabé. ¨Assié'vous sus l'assias ou la filyie!”

 

“S'i' n'vouos en est pon d'rein, Missis Le Feuvre,” Ph'lippe lî dis, “J'm'en vais r'pôser ma poutchie d'vièrs os sus la scabelle au pid du feu. I' fait eune fraid d'tchian à ces sé, 'ouos en châle, et j'ai l'trembliot. Pouv'ous m'êpaîngni eune pînchie dé s'no?”.

 

“Oui dgia!”, Lisabé lî dit. “Ch'est du s'no à Moussieu Simonet, tchi fait du bein où-est qu'nou l'met! S'ou-s avez fraid ès pids, halez don vouos bottes et m'ttez vouos pids sus l'sectîn au pid du feu!”

 

“Av'ous des nouvelles des garçons, à ches drein?” Ph'lippe démandit.

 

“Oui-dgia, Ph'lippe,” Jean Thomas lî rêponnit. “Nouot' couôthîn Cap'taine Lé Bro les vit à Paspébia quand l'Pâtruus 'tait-là, et il est v'nu nouos dithe tch'i' sont d'charme.”

 

“Combein qu'ou-s en avez, d'garçons, à La Côte?”, Ph'lippe lus d'mandit.

 

"Quatre!" Lisabé lî dit, “Jean, Charles, George et Françouais.”

 

“J'avais ouï, mé, qué l'George s'en allait tchitter à navidgi,” Ph'lippe lus dit.

 

“Jé l'pensons étout,” Jean Thomas lî dit. “Il est engagi à Ann Le Feuvre, tu vai-la fille à nouot' couôthîn Pièrre dé La Ville La Bas. Quand i' r'veindra d'La Côte i' s'en vont lus mathier. J'pense tch'il a idée d'rester à tèrre et d'sé mett' à forgi. Il est forgeux, tu sai. Il apprînt sa vocation seize san tonton L'Brun à St. Jean.”

 

“Est-i' acouo sus l'C.R.C., l'George?”, Ph'lippe lus d'mandit.

 

“Nannîn!”, Jean Thomas lî dit. “Il est à bord du Cornucôpia, á ch't heu. L's aut' garçons sont sus les runs ès Robins. Lé Charles est à Barachois, j'pense. Jean et Françouais sont à Paspébia.”

 

“Ou' n'savez pon tch'est qu'j'ai ouï,” Ph'lippe lus dit. “Eh bein lé mousse à Bram Le Ruez, tchi va à l'êcole, mé dit l'aut' jeu qu'san maître li-avait dit qu'j'allions aver des cârrosses sans j'vaux en Jèrri d'vant bein d's années!"

 

"Pouv'ous craithe tch'i' y'a d'pathelles cârrosses, vous, Mait' Ph'llipe?”, Lisabé s'fît.

 

“Man péthe bénîn, tch'est qu'j'allons dév'nîn si nouos routes s'en vont êt' encombrées d'cârrosses dé mème?”

 

“M'est avis, mé, Lisabé,” s'fît Jean Thomas. “Qué l'jour veindra qu'y'étha un tas d'drôles dé machinnes par les c'mîns! Jé n'vèrrons pon chu jour-là nous… I' pathaît qu'ya un homme tch'a mème êprouvé à brâsilyi tchique tracas pour li-aîdgi à voler en l'air comme un ouaîthé! Ch'tait en Angliétèrre, à ch'que j'ai ouï, et i' faillit à s'rompre l'co!”

 

“Eh bein, ch'est l'Bouan Dgieu tchi l'punit”, s'fît Lisabé.

 

“Quant a mé,” s'fît Jean Thomas. “Je n'sai pon. Moussieu Victor Hugo, l'êcrivain Français tch'est en Jèrri, a dit au couôthIn Cap'taine Le Feuvre, dé Gros Nez, tch'i s'passe des drôles dé choses en France étout. Et jé n'voudrais pon dithe qué ch'est contre la volanté du Bouan Dgieu, car lé minnistre m'a dit tch'il a liu dans les Saintes Êcrituthes qué j'n'avons pon veu l'quart dé tout tch'i' s'pas'sa sus la tèrre dévant la fin du monde! I' pathaît qu'y étha des tèrribl'yes dgèrres et qu'les nâtions s'sont rangies l's eunes contre l's autres, et qu'ch'es'sa un machacre abominabl'ye! Et pis qué l'Bouan Dgieu enviêtha d's ôrages et des tempêtes, des trembliéments d'tèrre et des d'luges comme janmais nou n'a veu et qu'la tèrre es'sa engaumée par les fliots! Mais ch'né s'sa pon dans nouot' temps, pathaît-i'. Lé minnistre mé dit qu'des chents ans pouorraient s'passer dévant que ch't âffreux boul'vèrsément-là veinge - ouaithe qué nou n'sait janmais! Enfin, la fîn du temps f'tha tout vaie! J'dév'thions êt' èrconnaissants d'pouver penser qu'la grand' probabilité est qu'j'éthons 'té appelés au r'pos êtèrnel dévant vaie d'itelles avâries. T'en vas-tu nouos graie eune bollée d'chaudé, Lisabé, pour rêcauffer les sangs à Ph'lippe dévant tch'i' s'en r'âge?”

 

George d'La Forge