Des ban'ses crouaîsies - Hot cross buns

Traditional Easter foods in Jersey are fliottes (for Good Friday) and mèrvelles (for Easter). Hot cross buns are a more recent arrival as a tradition, but that doesn't prevent us from providing a recipe in Jèrriais:

Des ban'ses crouaîsies

 

Îngrédgeins:

 

200ml dé lait

d'la cannelle

2 clious d'giroufl'ye

un quart d'eune tchul'lée à thée d'muscade

eune pînchie d'safran

450g dé flieu à boulandgi

du l'vain

100g dé beurre

50g dé jaune chucre (auve un mio d'extra pouor lé sitho)

eune d'mié-tchul'lée à thée d'sé

eune d'mié tchul'lée à thée d'gengivre en poudre

3 oeux

150g dé corînthes

50 g dé p'liche scandinne d'oranges et lînmons

3 tchul'lées à soupe dé flieu

 

Dans eune sâssepaine, caûffez la cannelle, lé giroufl'ye, la muscade et l'safran dans l'lait. Mitonnez, épis laîssiz pouor eune heuthe hors du feu.

 

Êputhez l'lait pouor haler l's êpices et r'caûffez l'lait, pon trop caud. Dans eune bolle, m'ttez la flieu à boulandgi et lé l'vain, et frottez l'beurre d'dans. Mêlez d'dans l'chucre, lé sé et l'gengivre. Faites un creux au mitan du mêlange et vèrsez deux d's oeux battus dans la flieu. Dêmêlez pouor en faithe eune molle pâte. Pêtrissiz pouor dans les dgiêx minnutes. Graîssiz eune bolle et m'ttez la pâte dédans. Laîssiz jusqu'à ch'qu'la pâte ait doublié en grandeu.

 

Vèrsez la pâte lévée sus l'compteux et pêtrissiz pouor acouo tchiques minnutes. Parfénez les corînthes et la p'liche (ou ofûche tchiques aut's frits s'lon san goût) sus la pâte épis pêtrissiz acouo eune fais pouor qu'lé frit sait distribué êgalement partout la pâte.

 

Spartissiz la pâte en 16 boules et m'ttez sus eune fielle en méta ou eune lachefraie.

 

Copez eune crouaix dans l'haut d'châque boule. Laîssiz les boules à lus l'ver pouor eune heuthe.

 

Dêmêlez l'restant d'la flieu auve eune pînchie d'sé et assez dg'ieau pouor faithe eune pâte (coumme d'la pâte à chucre). D'battez l'drein oeu auve deux d'gouts d'lait, et brîngiz châque boule d'auve lé mêlange d'oeu et d'lait. Pipez (atout eune pouque à piper) la pâte dé flieu sus la crouaix copée sus châque boule.

 

M'ttez au fou (à 200º) pouor dans les vîngt minnutes. Dêmêlez eune tchu'lée d'chucre dans dé l'ieau bouoilllante pouor en faithe un sitho. Halez les ban'ses du fou, peingniz les hauts auve lé sitho.