Lettre Jerriaise Samedi l'21 de Juin 2003

 Lettre Jerriaise Samedi l'21 de Juin 2003

 

Clifford Laisney a l'pliaisi d'vos souhaitter l'bouon jour aniet l'21 de Juin, 2003, en vos presentons la letter jerriaise. Premièthement, si ous_etes d'idée d'joindre les members de L'Assembliée pour une toun'née en 'Lorries' Samedi l'28 de Juin.sortant du Priory a Ste Marie a deux heuthes, vot pliait_ti averti Madanme Margaret Perrée au pus vite sus numero 861155 en orde de reserver une pliaiche. Le Prix. Adultes £12. Efants £6.

 

Une niet la s'm'naine passée, dans les p'tites heuthes du matin j'tais revilyi a reminer sus més pensées. J'trouve que quand nou_s_est trantchillye et qu'l'esp'rit a 'tait en r'pos, chés la l'opportunité de faithe les decisions, et donc le sujet pour mon pâlement d'aniet fut né.

 

J'menvais tachi d'vos donner un court accompte de nouvelles en general des s'm'naines passées concernant l's'iles couv'rant Jerri en partitchulyi.

 

Le titre de mon discours est 'Le Bull'tin Jerriais'

 

Les lignes en tête sus l'journal du sé du 9 de Juin. 'Attaque de Svastique sus Synnagogue. Des svastiques et cries d'gerre futent barbouillis sus les muthailles du Synnagogue a St Brelade duthant la niet. Ch'attaque coincide auve les pus importantes fêtes du calendrier Juif, et suggethe que chais les travaux d'une organisation néo;Nazi. Quouaiq'u j'avons une severité de vandalisme dans l'ile, le President et la Police sonts d'l'idée que chais les travaux d'une groupe. Chais gènant d'penser que Jerri, connu comme une ile d'ais'té et d'tranchil'té dans l'temps passé, est ach'teu invadée de malfaiteurs intente a detruithe a lus chouaix.

 

Samedi et Dinmanche le7 et l'8 de Juin 'tait l'occasion d'un concours d'élegance de vetûthes classiques. Le Festiva c'mmenchi auve des courses d'vitesse sus l'Av'nue Victoria et l'Mont d'Bingham. Le 'week_end' fini auve le concours de nenante vetûthes dans l'Parc. Accordant au President de l'Association d'vetûthes d'ancienté, l'occasion fut hardi bein r'chue par les ilemans et'tait une bouonne attraction pour les touristes. Hardi d'ieux érquemand'rais a lus anmins d'visiter l'ile en orde de vaie chu spectaclye.

 

Accordant es nouvelles de Mercredi l'11 de Juin, i pathaits que Jerri est en dangi d'aver une crise d'empliai. Je lièthons q'une autre quarantaine d'employis dans iune des banques sonts vont etre mins redondant dûthant les mais a suivre a cause d'amalgamation auve lus compagnie en d'Guèrnesy. Le president d'empliai etout est concerner d'la situation et a a'pplé une reunion pour evaluer la position. I'a hardi d'concerne etout dans la construction. Accordant a la gazette, gentiment d'gens cherche du travas comme tcherpentchiers et machonneurs, Est_que j'avons arrivé au point d'saturation dans l'batissage de maisons et d'apartements. Les agents d'affaithes onts appathence d'aver une abondance de proprieté a vendre.

 

Mercredi l'11. Acquo une attaque de vandalisme. Chutte fais sus l'baté d'sauvetage de St Cath'rine. Sus l'heuthe du diner des vandals entrites la station et s'rejouittes en faisant tchernage parmi l's'effets concernant l'usage du baté. Le Gouverneux d'la barre ne peut pas comprendre que tchitch'uns authaits telle p'tite presence d'idée d'causer chu donmage et d'mettre les vies d'tchiques malheutheuxs en dangi. Si janmais l'ocassion s'arrive que chais malfaiteurs onts besoin d'app'lé les services voluntaithes, p'têtre tchi pou'thons erflèitchi sus lus betises.

 

Le 12 de Juin. La saison d'patates en d'sastre. Accordant au President d'Administration pour l'export des patates royales, ch't'année erpresente iune des piethe saisons en r'cord. Les prixs onts diminué vitement et quouaiq'u la d'mande a 'tait assez bouonne, i pathait qu'la distribution es boutiques et marchiers a 'tait en tchèstchion. Ch'est probablye que ch't'année tchi suit, vetha acquo d'autres tchultivateurs tchitter le craissage de patates. Je lièthons etout que les gardeurs de bêtes ne sonts pas trop satisfés des r'tours tchi r'chêves pour la production d'lus lait. I sonts dans l'procés d'faithe des changements a la lait'tie a St Sauveur. I pathaits qu'une vingtaine d'employis sonts vonts etre mins redondant pour raithon d'économie. La situation d'fermage est serieuse, et nou se d'mande comment que dans l'avn'in la compagne s'en va combattre a ertenin la bieauté des herbages, clios et tout associé auve choses agricoles.

 

Lundi l'16 de Juin. Le Bailli reste ferme sus sa décision d'erfuser une licence d'alcool. Des milles de spectateurs enhannites d'une grand sé vendredi passé a l'ocassion des courses d'ch'vaux és Landes. La raithon en 'tait que le gérant resp_onsablye pour les provisions avait oublier d'faithe application au bureau du bailli pour la licence nécessaithe. Malgré les plaids d'l'Association et même du Connétablye, le Bailli resti ferme dans sa decision, et comme ch'la les ponteurs fit'tent lus gag'gie auve une langue bein pendue. Faut l'éspether tchi y'avait un bouon pits a la ferme d'Grosnez.

 

Mercie pour vot compagnie. J'vos souhaitte a tous une bouonne semaine.

 

A la prechaine.

 

Clifford Laisney