1958: L'Assembliée d'Jèrriais

 L'Assembliée d'Jèrriais

 

La rêunion mensuelle eut lieu Vendrédi au sé, l'18 d'Avri dans la Salle Publique dé St. Martin. Y'avait une chentaine dé membres présents et i' taient assis à des p'tites tablyes dans la salle bein cauffée et qu'avait té décorée auve des belles flieurs du r'nouvé, par les damnes du Conmité Dramatique.

 

Auprès qué l'rapport du mais d'Mars fut liu et approuvé, la ségrétaithe dit comment qu'tous avaient dêpiet d'oui qué Mme. Députée Green 'tait malade, et ou liut la lettre qu'ou li' avait êcrit li sou'aitant un rêtablyissement compliet et la rêponse èrchue dé Mme. Green.

 

Auprès qué neuf nouvieaux membres fûtent êlus, lé Président dit qué l'restant d'la séthée, 'tait dans la mains du Conmité Dramatique.

 

Séthée d'Chansons.

 

J'avions comme compères pour la séthée, les mêssieux Ph. Ahier et H. W. de la Mare, qui nos donnîtent un p'tit résumé d'la composition et origine dé châque chanson d'vant qu'ou fûsse chantée. I'y'avait dé vieilles chansons et des modernes, des risîblyes et de sérieuses, en effet pour touos les goûts! Eune chose bein seuthe est qué touos les chanteurs fîtent hardi bein. Mesdames F. de la Mare et E. Le Sueur nos am'nitent sus “Les Ponts d'Paris,” et nos amusitent hardi; les mêssieux d'St Martin: G. Le Masurier, G. Perchard, J. N. Richard et B. Amy nos chantîtent dans lus maniéthe si fanmeuse et quand les danmes A. Le Perchard, L. Richard et F. de la Mare chantîtent auve ieux i' futent bein appliaudis. Mme. D. Gruchy nos chantit d'eune belle vouaix “la Dreine Rôse dé l'Eté.” Les trais jeunnes démouaiselles Ruth Amy, Helen Perchard et Sadie Le Sueur chantîtent “Ma Normandie,” diversément bein et faut espéther qu'i' s'en vont continuer à chanter pour nous. D'autres membres qui prirent part 'tait Mesdames E. Vibert, M. de la Haye, Mlle. R. Syvret et l'Sieur H. W. de la Mare, et au piano Mme. Eileen Le Sueur.

 

Lé Soupé.

 

A maintchi d'la séthée, les danmes dé St. Martin, souos la direction d'Mme. Richard, nos servîtent un vrai souper Jèrriais! D'la bouanne gâche dé pâte, des mèrveilles et du magnifique café.

 

1958