1954: Le grand jour

 Le grand jour

Merrienne se fie sûs la Providence.

 

Moussieu l'Editeu,

 

La Merrienne, m'ayant d'mandé Jeudi au sé tchèsqu'y s'était passé dans l's'Etats, j'l'y dit que l'Sénateur Jack Le Mérquand n'tait pûs membre du Comité d'la Santé Publique.

 

            “ Et pourtchi chonna ? ” ou d'mandit.

 

            “ Parsque, j'l'y dit, ” sept candidats ont tait propôsés pour siez vacances, et il a tchais de d'sous. Y n'a pas yeu l'support tch'y méthitait des members d'Campagne, et ch'est chein qu'je n'comprends pas. La Ville, bein seux tait contre, mais la Campagne a ocquo une mâjorité dans la Chambre, et s'oulle avait tait solide, il y s'sait v'nu sans autcheune diffitchulté. ”

 

            “ Et pourtant, ” ou dit, “ prèsque toutes les pâraisses sont pour l'y. Il est bein evident, par chein qu'tu m'dis, que y'a des githoutêttes dans l's Etats. Chonna dait y'avé fait ma, à notre Jack. ”

 

            “ Un mio, sans doute, ” j'l'y dit, “ mais ch'n'est pas oublié, et il est bein lien d'être dêcouothagi. Un gas tch'a tait né ès Landes peut tréjous se r'dréchi quand il a attrapé une tappe. Y s'sa ocquo là après l's'êlections à la fin d'l'année tandis qu'pûs d'yun tch'y l'oppose ach'teu s'sa forchi d'resté siez-l-y à soigni sa volaille et sérclyié san gardin. Quand-même nou n'peut sinon dithe que pour le moment y n'est pas si populaithe dans la Chambre comme nous éthait creu. Sûs un sens il est p't'être à bliamé, car nou y'avait d'mandé d'résigni du Comité et il avait r'fûsé, et ch'est une chose tchi n'se fait pas. ”

 

            “ P't'être bein, ” ou dit, “ parmi des gens ordinaithes, mais quant il est tchéstion d'un Saint-Ouennais avec une tête tchi romp'thait un maillot, ch'est difféthent. Ach'teu, Ph'lip, ch'est l'grand jour Mardi tchi veint ; tchèsqu'y s'en va arrivé ? De touos les bords j'entends q'chutte fichue louai-là pour le Service Nâtional a une chance de passé, et pourtant l'Jack Le Mérquand avait dit en Ville l'autre jour qu'ou n'pâss'sait pas, et tch'il en n'tait seux. Tchèsque tu'en crais ? ”

 

            “ Y'a tchinze jours que j's'y à tâchi d'fidguthé chonna, Merrienne, ” j'l'y dit, “ et j'n'en s'y pas d'pûs l'avant, mais y'a une chose tchest cértaine et ch'est que n'y'étha prèsque rain d'un bord ou d'l'autre. Nous a ouï que l'Sénateur Le Fevre s'sa là, et nous à ouï étout qu'un certain membre dans l'Ouest a décidé d'ignoré l'mandat d'ses pâraissiens, et d'voté contre, mais n'y'a autchune asseuthance que quand veindra l'jour y' n'chang'gea pas d'idée. ”

 

            “ Si c'h'est d'même, ” ou s'fit, “ y faudra faithe tchiquechose, comme j't'avais dit l'autre jour. Si toute la pâraisse de Siant-Ou dêshallais Mardi, et remplissait la Place Royale, y'éthait p't'être tchiques membres tch'éthaient peux d'appréchi. ”

 

            “ J'en doute Merrienne, ” j'l'y dit. “ Bein seux qu'la pâraisse s'sa bein r'présentée, mais n'oublie pas qu'la Police s'sa là étout. Et au jour d'agniet, ch'n'est pas d'la petite bièthe que la Police salariée. Aut'fais nou s'en fichait, mais y faut être pus r'gardant agniet. Si y'a du brit, y'étha d's'arrets étout, et nou n'voudrait pas vais une douzaine de nos garçons d'vant l'Juge Dorey Mêcredi matin pour avé fait du troublye. ”

 

            “ Nan, ” ou dit, “ bein seux, mais nou peut faithe san protêt et ocquo s'comporté. Eh p't'être que l's'auberges s'sont freumées dans la matinée. Y n'faut pas grandchose, comme tu l'sais pour encouthagi d's'hommes à faithe des bêtises. J's'y prèsque à même de prendre yunne de chais boutiques aupi d'la Vieille Eglyise pour faithe du tais et p't'être un mio d'café. Chonna m'ecauffe, mais pas l'sang, y'éthait des sous à y faithe. ”

 

            “ Je n'crais pas, Merrienne, que tu'éthais hardi d'clients. A Saint-Ou ch'est les femmes tch'avaient le tais et l'café. L's'hommes préfèthent tchiquechose un mio pûs fort. ”

 

            “ J'n'ai pas vêtchu avec té si longtemps sans l'savé, ” ou dit séquement. “ Enfin, si n'y'a rain qu'nou peut faithe y faut s'y résigni, éspethant quand-même que la Providence ne nos abandonn'na pas Mardi, et que dans l'arlevée toutes les couleurs s'sont à haut dans la pâraisse. ”

 

            “ N't'y fie pas, ma vieille, ” j'l'y dit. “ La Providence se trompe tchiquefais. ”

 

Ph'lip.

1954