1958: Rêunion en Plien Air.

 L'Assembliée d'Jèrriais

Rêunion en Plien Air.

 

J'tions favorisés sus pus d'un sens pour la Rêunion Mensuelle du 29 d'Août - d'aver eune si belle séthée - et d'pouver aller sus ieune des belles anciennes fèrmes dé Jèrri. (Les Hêtres, St. Pierre).

 

Lé Président, lé Sieur Chs. P. Billot 'tait en chèrge et l's affaithes furent copés d'court pour profiter du jour. I'y eut trais membres juniours et chinq autres membres d'êlus.

 

Lé Comité Dramatique avait arrangi eune séthée d'courses pour jannes et vièrs, et i'sembliait qué y'avait autant d'intéthêt parmi les dreins-nommés comme parmi l's autres. Y'avait des courses pour tous; les jannes tch'avaient tout plien d'haleine couothaient comme des héthondes, mais les femmes né pathaissaient pon fort accouoteumées à couorre en pouques, mais ils e[û]tent lé couothage dé y'éprouver quand-même, et il' eûtent hardi d'amusement à vaie l's hommes à “servi d'chiviéthe” auprès. La course à trais gambes rêussit hardi bein. Pour les mains capablyes les “oeufs en tchulliers,” lus donnit d'l'exercise, et y'en avait qu'allaient comme si lus vie d'pendait sus la fin d'la course! Ch'tait hardi amusant!

 

Les mêssieux J. N. Richard et G. J. Perchard 'taient en chèrge et l'affaithe marchi bein jusqu'à qu'la niet nos attrapîsse, quand nou s'coulit en d'dans pour aver du mangnifique souper auve du bouan café, tch'avait 'té prépathé par les danmes du Conmité Dramatique.

 

Auprès l'souper, pour fini la séthée, j'eunmes des “20 tchestchions.” Un coup chennechin fini, lé Président èrmèrcyit lé Sieur W. Robert, sa danme et sa fille pour nos aver pèrmins d'aller siez ieux, et pour tout l'embarras qu'il'avaient prîns, à tchithier des bancs et les vaissieaux pour nous, lé Conmité Dramatique pour aver arrangi la séthée et touos les siens qu'avaient prîns part dans les courses; et annoncit la Rêunion Générale Annuelle pour Vendrédi, l'26 d'Septembre, dans la Salle d'Agritchultuthe, à St. Hélyi, à 8 heuthes.

 

1958