1951: Les d'vis du Bouan'homme George

 Les d'vis du Bouan'homme George.

 

I' m'enn'yie à ses sé, et j''m'en vais êcrithe tchiques mots pour met' dans la Chronique en Jèrri, - tch'est si liain d'ichîn. N'l'y a pon si longtemps qué j'y'étais, en Jèrri. Ch'n'est qu'aniet Jeudi, et j'y étais Sam'di passé! Dînmanche et Lundi j'tais à St. Malo, - Mêcredi, j'tais à Paris, - a ces sé mé v'là dans un grand' hôtel à Marseille, eune belle grand' ville tchi s'étend entre ch't'Hôtel ichîn, tche'st sus la hauteu, - et la mé, - la Méditérannée.

 

Démain au sé, j'es'sai en mé, - en c'min pour la Terre Sainte, qué j'ai tant voulu vaie toute ma vie!

À ces sé, - comme j'vouos l'dîsais, - i' m'enn'yie. J'donnais autcheune chose pour ouï du Jèrriais, mème quand ch'né s'sait que d'ouï Mèrriene picangni l'pouor' Ph'lippe ! J'savais bein qué jé n'gangnais rein d'êprouver à faithe lé Ph'lippe viagi auve mé, car Mêrriene né l'éthait janmais laissi hors dé veue! Et j'don'nais autcheune chose pour vaie un Jèrriais et li bailli d'ma bec! Ch'es'sait en Jèrriais qu'nou pal'lait, sans doute, - la belle vielle langue dé not' pétit pays! A la pliaiche de m'met à êcrithe chen'chîn, j'ithions probabl'yément faithe un tou dans la ville en pâlant. Et bieau qu'nou vait un tas d'belles choses à Marseille, ch'est à bein prés seux qu'nou pal'lait d'Jèrri. Quand nou-s est Jèrriais n'l'y-a pon d'souain ouêque nou-s est, chutte p'tite île là vous r'veint tréjous dans l'idée et dans l'esprit.

 

Mais, tch'est qué j'gangne dé vouler aver la compangnie d'un Jèrriais ichîn à ces sé? L'y-en à p't'êt' iun d'tchiquebord dans l's' envithons, car nou-s en trouve partout l'monde. Mais i' pouorrait tout aussîn bein êt en Afrique, car jé n'séthais pon ioù chèrchi pour lî! Enfîn: bieau qu'jé n'peux pon pâler à autcheune pèrsonne en Jèrriais, j'peux au mains y penser en Jèrriais, et mé v'la à l'êcrithe! V'la tchi m'passe l'enn'yon.

 

J'ai 'té dgiex heuthes dans l'train aniet à v'nîn ichîn d'Paris. J'ai pensé, - j'ai liu un livre, - j'ai dormillionné, et j'ai r'gardé par la f'nètre. La campagne vallait la peine dé vaie. Et l'y-avait d'belles villes à vaie en passant, étout, - des villes historiques. Avignon en n'tait ieune. Ch'est assez tchuthieux, j'tais à liéthe l'histouaithe (dans un livre en Français) d'la Reine Anne dé Boleyn d'Anglétèrre. Chutte pouorre fille-là en eut, d'la peine, -et ou' fînnit par pèrdre sa tête par dessus l'marchi! Ch'tait au moment qué s'n'homme, lé Rouai Henri Huit, 'tait à êprouver à faithe lé Pape lî donner un Divorce qué l'Pape 'tait l'prîson'yi dé Charles-Quint à Rome, et qué l'fanmeux Cardinal Wolsey 'tait en France et êcrivait au Rouai Henri tch'il' allaient êprouver à assembl'yer les Cardinaux libres à Avignon et tâchi d'les faithe lî bailli san divorce. Et ch'tait en liaisant chutte partie-là d'l'histouaithe qué j'ai arrivé à Avignon!

 

I' fait caud, ichîn, - assez pour faithe moûtchi les vaques ! Ch'est tant mus qué j'ai 'té accouoteunmé à la chaleu, ou bein j'éthais probabl'yément d'la peine à dormi chutte niet. Les f'nêtres dé ma chambre sont grand' ouvèrtes à côté d'mé comme j'êcris chen'chîn, - mais... i' fait caud ! J'êchang'geais bein ma chambre pour eune pétite bijuque ès Landes sus l'haut du Pûlé, - l'y'éthait au mains eune pétite brîse dé vent là pour mé rafraîchi, mais à mains qu'ch'es'saît dans mes rêves jé n'peux pon faithe l'êchange à ch't'heuthe ichîn, - j'manqu'thais man bâté d'main !

 

Enfîn, j'm'en vais m'couchi, - et j'sis si lâssé qué j'm'en vais dormi comme un êfant. Ch'est seux qué jé n'm'en'vais pon rêver la rouoge trie ni l'nièr couochon chutte niet ! Démain au sé, si l'Bouan Dgieu m'prêsèrve, la mé m'bèrchétha, - comme oulle a bèrchi man pèthe et man grand-péthe dévant mé, - et tant d'mes anchêtres et pathents !

 

George d'La Forge.

1951