1951: Le census.(2)

 Le census.

Les sous sont péyis.

 

Moussieu l'Editeu,

 

Quand j'tais en ville hier, j'rencontrit un vier amin que j'n'avais pas veu pour pûs d'siez mais. Y pathaissait tout joyeux, et quand j'eûmes châtchi d'main, et pâslé du temps, j'l'y d'mandit pourtchi. “Tu'as l'air content à matin,” j'l'y dit; “as-tu par chance yeu d'bouonnes nouvelles?”

 

“Oui,” y raiponnit. “Hier y m'vint une lettre de l'Hotel de Ville me d'mandant d'allé r'chévé les sous qu'nou me d'vait pour avé agit comme ênumérateur au Census. J'en r'veins et les sous sont dans ma pourchétte, crai-le s'tu veur.”

 

“Mais, absolûment,” j'l'y dit, “y tait bétôt temps. Avais-tu pon fini la djobbe au mais d'Avri?”

 

“Sans doute,” y dit, “je crai que ch'tait l'douze ou l'tchinze que j'lûs portit les schédules, et j'contais tch'y taient corréctés, mais nouffé, car y'a à ben près un mais j'eut un méssage me dîsant tch'y voulaient m'vais au sujet d'chais schédules.  Le moussieu tch'a tait des s'maines et des s'maines à l's'examiné avait trouvé que j'n'avais pas compliété toutes les colonnes tch'y d'mandaient d'l'informâtion.”

 

“Ah,” j'l'y dit, “tu n'avais pas fait chonna comme-y-faut.”

 

“Ma fé!” y dit, “j'avais fait d'man mûs, et j'fut ben surprint d'savé que j'avais mantchi ichin et là. Mais quand j'vint à éxaminé l'affaithe, au lieu d'être mârri, je n'put pas m'empêchi d'rithe, car y m'sembliait que tchitchunes des tchéstchons taient un mio riditchules. Par éxemple je n'lûs avais pas dit à tch'il âge qu'une cértaine bouonnefemme, tch'est Française, et tch'y n'sait ni lièthe ou êcrithe avait tchitté l'êcole.”

 

“Ecoute,” j'l'y dit, “ès-tu sérieux, ou est'che du gniolin que tu'ès à m'raconté?”

 

“Ch'est la puthe véthité,” y raipondit. “J'fut la r'vais la vieille. J'la trouvit à chérchi pour des colimachons et des limaches dans san mio d'gardin. Quand j'l'y pôsit la tchéstchon, ou grattit sa vieille tête en êcrasant un malheutheux colimachon souos san chabot, épis ou m'dit qu'ou n'avait jamais tait à l'êcole, et qu'ou n'en n'tait pas d'pièthe, car ou n'avait jamais trouvé une personne êdutchi tch'y pouvait la battre à houétté un bétchet d'raves ou à êterré des patates. J'êcrivit sûs la forme qu'oulle avait tchitte l'êcole à l'âge de chinq ans, épis j'm'en fut vais l'bouonhomme de quatre-vingts-trais tch'y n'a jamais travaillyi. Nou voulait savé tchèsqu'il avait fait d'vant chonna. La tchéstchon tait: “What was his previous occupation?”

 

“Mais,” j'l'y dit, “si, comme tu dis, y n'avait jamais travaillyi?”

 

“Y n'a jamais fait un coup d'travas, ach'teu je n'savais pas trop ben comment raipondre à la tchéstchon. Ma femme me suggéthit d'lûs dithe que tant une vie antérieure il avait tait un raboteux d'routes dans la pâraisse de la Trin'té, mais j'n'ôsit pas, car y n'faut pas s'motchi d'chais mêssieux, ch'êstentchi j'mint tch'il avait pérdu sa mémouaithe et n'se r'souv'nait pas. Y'avait étout la femme tch'y me m'nichit avec un manche de bringe quand j'eut à l'y d'mandé tchèsque était l'pèthe de chu mousse-là. Tu pâsle que je n'fut pas longtemps d'vant trouvé la porte.”

 

“Mais enfin,” j'l'y dit, “tu'as r'chu tes sous.”

 

“Ah, vèthe,” y dit, “j'ai r'chu mes sous. J'criyais tchi me v'nait tchiques chélins d'pûs, mais dans des cas d'même nou prend chen tch'y vos donnent et nou n'dit rain. Et j'ai la satisfaction de prouvé à la bouonnefemme qu'oulle avait tort en dîsant qu'les sous taient dans les fonds pérdus.”

 

“Pûs qu'chonna,” il ajouôtit, “ou r'vint d'Saint-Ou une arlevée, avec une histouaithe que les membres du Comité pâslaient d'une vacance de tchinze jours à Saint-Malo, étant d'opinion qu'les sous s'saient ben mûs dépensés d'chutte manièthe-là que d'les donné à des gâs comme nous, tch'y s'saient seux d'les gaspillyi.”

 

“Tu n'criyais pas chonna, absolûment?”

 

“Damme, nan. J'savais ben que ch'tait des bêtises, car j'ai connu l'Président du Comité toute ma vie, et j'l'ai tréjous veu un honnête homme, tch'y n'se prêt'tait pas à patheille chose.”

 

“Ben seux qu'nan,” j'l'y dit.

 

Ph'lip.

1951