1958: Le Depute Crill resigne

 Le Deputé Crill résigne.

Merrienne d'mande pourtchi.

 

Au Portinfé,

Jeudi au sé.

 

Moussieu l'Editeu,

 

Y n'est que siez heuthes, mais y faut que je m'dêpêche, car ch't'arlevée j'm'en vais à Saint-Piêrre pour le Show des boeux, et j'ai ocquo bein des choses à faithe d'vant dîné.

 

Quand je m's'y l'vé, y n'tait pas ocquo chinq heuthes, mais y'tait prèsque plien jour, et les p'tits ouaisiaux chantais lûs cantiques dans l'gardin. J'avais éspethé, sûs un sens que l'achie de hier au sé éthait duthé toute la niet, mais enfin, en r'gardant à travers la f'nêtre, j'ai veu que tout était mouoillyi et au pûs vite je m'sy habillyé un mio et j'ai dêshallé pour vais si ma bordeuse avait profité d'la plyie. Chein qu'j'ai veu, Moussieu, m'a pliut hardi, car mes patates sont ach'teu prêtes à froutchi, et j'm'en vais m'y mettre d'main-au-matin. Si j'n'avons pas yeu un fricot pour Pâques, je s'y seux ach'teu que j'en éthons yun à la Pent'côte.

 

Mais, Moussieu, j'ai une triste nouvelle à vos annoncé au sujet d'ma p'tite géniche, car oulle est malade, la pouôre bête, et ne v'la deux jours qu'ou n'a pas voulu mangi. Oulle est si fliaque que n'ou peut prèsque vais à travers, et je doute hardi que j'pouôrrai la montré la s'maine tchi veint.

 

La Merrienne dit que j'l'ai trop souognie, et qu'ch'est d'ma faute. Ou dit étout qu'un homme tch'a gardé des bêtes aussi longtemps comme mé dév'thait savé qu'à ch't'âge-là un homme tch'y pousse un bouon viaud n'est qu'un imbécile, et entre nous, Moussieu, j'admets qu'oulle a raison et que j'éthais deu savé mûs.

 

Hier au sé, la bouonnefemme, ayant veu sûs la gâzette que l'Député Crill, de Saint-Cliément avait résigné, me d'mandit si j'savais pourtchi qu'il avait fait chutte dêmarche-là,

 

“Mais, ma pouôre fille,” j'l'y dit, “tu dais avait veu que dans sa léttre au Baillyi y donne ses raisons. Comme Avocat, avec tout-plien d'clients, y n'peut pas ach'teu affôrdé l'temps tch'il a tréjous donné à san travas dans l's'Etats, épis n'oublie pas tch'il a une femme et trais êfants.”

 

“Et tchèsqu' ch'est que trais êfants?” ou s'fit. “A s'n'âge nous, j'en avions sept ou huit et bouonne éspethance de yun ou deux d'pûs.”

 

“Vèthe, Merrienne,” j'l'y dit, “mais dans chu temps-là y n'couôtaient pas comme les mousses d'ach'teu, épis y y'avait tout-plien de nouôrrituthe à bouon marchi. Mais, entre nous, je s'y pérsuadé que la vraie raison, ch'est que l'Sieur Crill s'en va bétôt être nommé Avocat-Général.”

 

“Mais, comment chonna,” ou d'mandit, “viyant que l'Sieur Le Mâsuthi a chutte djobbe-là?”

 

“Y s'en va, sans autchune doute, monté pûs haut,” j'l'y dit, “une fais que l'Protchutheux s'sa nommé Député-Baillyi. Ch'est tout arrangi, ma vieille.”

 

La Merrienne ruminit là-d'sûs pour une minute ou deux, épis: “Si ch'est d'même,” ou dit, “ch'n'est pas la peine d'en pâslé, mais j'éthais creu que dans tous chais changements nous éthait peut trouvé tchiques djobbes pour des hommes comme le Sénateur 'J. J.' et notre D'puté. La pâraisse de Saint-Ou n'pathait pas trop bein dans tout chonna. Mais ach'teu, tchèsqu'y s'en vont méttre Député à Saint-Cliément? Ch'est grand dommage que n'y'étha pas un Crill dans l's'Etats après toutes chais années.”

 

“Tu'as raison, Merrienne,” j'l'y dit, “et chein qu'nou r'grétte le pûs ch'est d'vais dispathaitre chu bouon vier citoyen, l'ex-Connêtablye. Si jamais y'a yeu un vrai Jêrriais dans la Chambre, ch'tait l'y, mais nou craint que n'y'en a pas hardi d'sa sorte dans l'île agniet. Nou l'y souhaite miyeu santé pour profité du r'pos tch'il a si bein méthité.”

 

“Amen à chonna,” ou s'fit. “Chein qu'y'a d'pièthe, dans chutte vie, n'ou n'a pas tréjous chein qu'nous a méthité.”

 

“Damme!” j'l'y dit, “ch'est vrai, car autrement j'éthais 'tait millionaithe y'a longtemps, et té tu'éthais une robe de souaie touos les jours.”

 

La bouonnefemme souôrit. “Tu m'fais rithe, man Ph'lip. A qu'menchi, un homme tch'y veur être millionaithe est une fichue bête, et une femme tch'y voudrait être vêtue en souaie touos les jours est ocquo pièthe. Je sommes bein mûs comme je sommes, man Ph'lip. Ach'teu j'pense bein qu'tu'as dans l'idée d'allée à chu Show d'main?”

 

“Mais bein seux, Merrienne,” j'l'y dit.

 

“Et pourtchi qu'tu veur y'allé? Tu n'as pas d'boeu à montré et y'a hardi à faithe ichin. Ch'est pérdre tan temps de t'n'allé à Saint-Piêrre, et tu l'sait bein.”

 

“Nouffé, Merrienne,” j'l'y dit. “Il est vrai que j'n'ai rain à montré, mais ch'est tréjous un pliaisi d'rencontre ses viers amins pûs qu'chonna, ma chiethe, un fermyi tch'y prend pas une p'tite vacance de temps en temps, mais tch'arrête pour le jour que n'y'étha rain à faithe sûs la férme, peut arrêté toute sa vie, et n'le vais pas.”

 

“Oh, bein,” ou dit, “mais prends bouon soin d'être r'venu en temps pour traithe.”

 

Quant à chonna, Moussieu, j'en doute assez!

 

Ph'lip.

1958