1956: La fatale mêprinse

 La fatale mêprinse.

Et des craques dans l'chimtièthe.

 

Moussieu l'Editeu,

 

Quand la Merrienne liut la gâzette Mardi au sé oulle eut une grande surprinse, car oulle avait tréjous creu que n'y'éthait pas hardi de difféthence entre les deux candidats. J'avais tait d'la même opinion pour un temps, Moussieu, mais sûs l'drain j'tais v'nu à pensé que la mâjorité pour le Sieur Clarke pouorrait être pûs grande que nou s'attendait.

 

“Eh bein, Merrienne,” j'l'y dit, quand ou me d'mandit tchèsqu'en n'tait la raison, “y'en a pûs d'yunne, mais à ma veue, la grande mêprinse que l'Sieur Troy fit ch'tait d'prendre si longtemps à s'décidé. Quand à la fin y s'annoncit candidat, le Sieur Clarke s'était dêjà asseuthé de tchiques chents vouaix. Dans d'patheilles affaithes ch'est d'se dêcliathé tout-d'suite et de s'méttre à chérchi des vouaix sans perdre une minute. Dans les viérs temps, ichin à Saint-Ou, le moment qu'nu savait qu'y'éthait une vacance, les deux partis 'taient en bataille.”

 

“Damme, vèthe,” ou s'fit. “Du preumié jour y'avait des gens à la porte, et sûs la fin une niet n'se passait pas sans du gravi à la f'nêtre de notre chambre. Je n'voudrais pas dithe combain d'fais que j'ai d'vallé les d'grès dans ma qu'minsolle tandis qu'tu tais à chérchi pour tes brais à la veue d'une faillyie chandell. Même, une bordée, j'attrapit une suée d'fraid tchi m'mint au liet pour une semaine.”

 

“Ah, tchi bouons viers temps, ma Merrienne,” j'l'y dit. “Mais au sujet d'l'êléction en Ville, nou peut vais ach'teu pourtchi qu'la mâjorité tait si grande. Y faut dithe étout qu'les fichues femmes ne dêshallites pas comme nou s'attendait, après l'heuthe du tais. Sans doute y 'taient ès pictures, à dêpensé lûs sous inutilement.”

 

Ou voulit dithe tchiquechose la d'sus, mais j'continuit: “Sûs man preumié point,” j'l'y dit, “j'me r'souveins d'un autre candidat tch'arrêtit trop longtemps. Ch'tait l'Sieur George de Cart'ret à Saint Piérre, y'a bin d's'années. Y'avait une vacance pour Chantgni, et nou l'y d'mandit d'prendre, mais y n'en voulait pas à autchun compte. Quand à la fin y changit d'idée le Frainque Le Feuvre avait tait chérchi des vouaix dans toutes les cârres de la pâraisse, et hardi d's'êlécteurs, ayant entendu que George de Cart'ret n'tait pas sûs les rangs, dites oui, et tu sais bein que quand un homme a donné sa pathole, y n'aime pas à touône d'bord. Le jour de l'êléction le Sieur de Cart'ret pérdit une êléction tch'il éthait peut gagni facilement, mais ch'tait d'sa faute.”

 

“Et j'me r'souveins étout d'l'êléction pour Député dans la même pâraisse, en trente-sept,” je continuit. “Touos les pâraissiens fiéyaient que Moussieu Giffard s'en allait r'prendre, mais y dit nânin à une forte députation, et Hedley l'Bro, tch'y 'tait Chantgni dans l'temps, fut pérsuadé d'prendre. Quand Moussieu Giffard vint dithe, justement d'vant la nomination, qu'après tout y réstethait ocquo pour trais ans, l's'êlécteurs, ayant ouï que ch'tait un cértain tch'y l'avait pérsuadé, n'taient pas contents, et quand vint l'jour Moussieu Giffard fut battu par vingt-quatre vouaix - ocquo par sa faute.”

 

“J'me r'souveins d'chu jour-là,” ou dit, “car à la Trin'té le grand Jack Cabot, et ichin à Saint-Ou le Jean Priaulx en remportit par trais vouaix contre le James Le Bro, tch'y tait d'la Rose.”

 

“Epis,” j'l'y dit, “ y'eut un protét et une deuxième êléction quand l'Sieur Priaulx eut yunne ou deux vouaix d'pûs. Damme! y'eut des sous de dêpensés chutte bordée-là. Tchiques années après l'Jean Priaulx m'dit qu'la preumièthe êléction y'avait couôté mille louis, et la s'conde ocquo pûs. Oh, les bouons viers temps, quand le Louothi et la Rose 'taient tréjous à s'entre-battre, et quand les sous n'mantchaient pas pûs d'un côté que d'l'autre! Au jour d'agniet notre Député n'est pas même un Saint-Ouennais et n'est pas sûs un seul comité d's'Etats. Pas êtonnant qu'nou ouait tchi 'trouve de drôles de craques dans l'vier chimtièthe.”

 

La Merrienne dit que ch'tait possiblye, mais qu'ou voudrait vais les craques d'vant l'craithe!

 

Ph'lip.

1956