Tuesday 10 November 2015

1913: Most Heartlessly Selfish Man in Jersey

Chette-chîn est eune histouaithe des pus rîthibl'yes, des pus cruelles, et ofûche des pus néthes dans la littéthatuthe Jèrriaise. Nou n'saithait sait s'êgouffer d'rithe sait plieuther:

This must be a candidate for the most outrageous text of black humour in Jèrriais literature: Piteur's suggestion that he'd rather let his wife die (of the wound he inflicted on her through carelessness) than have her clomping about on a wooden leg and keeping him awake... is one to laugh or to cry?

Most Heartlessly Selfish Man in Jersey
L'affaithe empiethe, boustre d'mêtchi! Ch'est pour me faithe anglyi, chose seuthe, mais chutte gambe, qu'j'avais pourtant dollée et nettie d'man mus, est a ch't'heu de toutes les couleurs. Et Laïzé nos dounne d'l'embarras: jommais nou n'créthait! Ou n'mange pon, ou s'teurt et s'touiste d'un bord sus l'autre, dans san liet; et je n'peux don pon dormi m'n'aise. Et mes r'pas! Pour dithe vrai, j'n'ai pon yeu un bouan diné d'pis eunne tchinzainne. J'nos nouorissons, Lonore et mé, sus du 'tin meat,' d'la caboche bouollyie, et du pain. Pour vin que v'la tchi continue oquo tchiq' temps, j'devaindrai sec coumme un héthan funtchi.

Et l'docteu pâsle de lis copé la gambe! ni pus ni mains. L'poummé d'sa gambe est niér coumme un ticlye et gros coumme ma tchesse; et ou radotte par bordées. Avant hier, j'rapporti eunne douzaine d'oeus d'France: Lonore lis bouollyi l'sien qu'était cratchi, et j'eûmes le restant en oumlette, ma fille et mé. L'oeu fut un mio trop bouollyi, faut créthe: mais 'taiche eunne raison, j'vos d'mande, pour prétendre qu'ou n'pouait l'mangi, et dithe qu'oul ethait aimé un mio d'not' omlette si y'en avait yeu d'èspeine. N'y'en avait pon d'èspeine, et pis, v'là!

Et l'docteu voudrait lis copé la gambe pour sauvé l'restant du corps. Coumme si l'restant du corps d'eunne femme a gambe-de-bouais m'servithait a grand chose. Ou n'pouorait pus s'baissi a m'dèslachi mes bottes quand j'rentrethais tard d'un diné d'Agritchultuthe ou d'même! Et quand j'voudrais prendre man soumme sus l'sofa d'la tchuisinne après diné, y'ethait tout l'temps l'sabat d'chutte buche sus l'plianchais a m'empêchi d'dormi a m'n'aise.

Et tant pus l'temps avanche, me dit l'docteu, tant pus y'a d'danji, et tant pus il en couot'ta.

"Tchês qu'tu veux man pouore Piteur, qu'ou m'dit en pleuthant, j'sis tout à fait entre tes mains; et ch'que tu decid'das s'a tout a fait pour le bin! Si j'sis pour mouothi, j'sis tout a fait prête - qu'ou dit en touonant ses yeux au pliafond - a dèslouoji. Si tu trouves que vinchinq louis chest trop chi pour me copé la gambe pour me sauvé la vie? eh bin! ch'est a té a décidé. Si ma vie, ov eunne gambe de mains, n'te sert pon a grand chose, eh bin! a la paix du bouan Djeu! j'ai tréjous tâchi d'faithe man d'vé. Mais cartchulle bin d'vant que d'décidé! Pouor'ous vos graie sans mé, té et not' êsfant? Et si vos faut prendre eunne servante quand j'ne s'ait pus la a vos souognyi - as tu compté ch'que ch'la couote, eunne garce de servante, qui te d'pich'cha toute la vaisselle et itha s'proumné l'sé ov des soudards de d'sus l'mont?"

J'pliethimes ensemblye un mio touos les deux, en pensant a toute la minzethe qui m'attendait: et pis Laizé m'dit qu'il 'tait temps d'allé nos êstchippé, Lonore et mé, pour êque j'l'emnisse ès Pictures. Coumme nou n'pouait faithe rin pour lyi, et qu'jethai 'té dommage de perdre les titchets qu'nou m'avait dounné, j'nos en fûmes après y'avé allumé sa lampe et mins eunne modjie d'ieau pannée pour s'oul avait sé.

Mais, tout d'même, j'sis bin a pliendre, est-che pas?

Piteur Pain
Morning News 15/10/1913

No comments: