Nout' Libèrté

Né v'chîn l'texte d'aniet d'not' auteu du mais, Florence Mary Hacquoil (FMH):

Here's today's text by our author of the month, Florence Mary Hacquoil (FMH):

Nout' Libèrté

Nout' pépée voudrait saver
Ouècque est don nout' libèrté?
Quand un houmme au jour d'agnièt
Dé bâti n'a pon lé drouèt.

Ch'avait 'té san întention,
Dé bâti eune belle maison,
Ouècque i' pouorrait s'èrtither
Et un gardin tchultiver.

I' n'avait pon rêalisé,
Qu' ch'est ès Comités dé décider,
S'il étha la permission
De faithe autchune construction.

D'Biautés Naturelles, le Conmité
Vint la pliaiche examiner.
I' trouvites qu'la maison gât'tai,
D'la Vingtaine,toute la biauté.

Ch'n'est pon là l'seul conmité
Tch'a lé drouèt dé vos r'fuser;
Y'a accouo, les Travaux Publics -
Sans pâler d'la Santé Publique.

Même s'i' vos permettent dé bâti,
La maison nou' n' peut couvri
En tuiles, s'ils ont décidé
Qu'les ardouaises f'thaient sa biauté.

Nos anchêtres au temps passé,
Dans lus caves au bord d'la mé,
N'avaient pon de Conmités
Dé la sorte à les c'mander.

S'ou voulez chonna changi,
Et les contrôles aboli;
Chouaissis coum' Député
Un houmme qu' aime nout' libèrté.