Here's today's text by our author of the month, Florence Mary Hacquoil (FMH):
Quand j'tchittai l'êcole
Sièz nous toute la convèrsation
Touonne sus une important tchestion
Car mes pathents voudraient saver
Tch'est qu'j'm'en vais faithe quand l'êcole j'tchit'tai
Comme man pépée est tchèrpentchi
I' dit que j'dev'thais suivre san mêtchi
Mais mémée voudrait qu'j'es'sais fèrmi
Comme man papa Le Boutillyi.
I' perdent bein lus temps à distchuter
Car man avenin est décidé
Ch'n'est pon sus la terre qué j'm'en vais rester
J'ai l'intention ès plianètes dé voler
Dès que mes examens j'éthai passé
En Anglièterre dans un collège j'ithai
Et un pilote j'm'en vais dév'nin
Pour voler dans l's avions d'l'avenin.
Le tou du monde jé pouorrai faithe
Dans un couple d'heuthes coumme la lumièthe
Quand j'pense qu'y'a quatre chents ans
Sir Francis Drake i' mint trais ans.
J'vos ramen'nai de belles hardelles
Des plianètes qu'nou vait comme des êtelles;
Et les gens ithont lus vacances passer
A Saturne, à Jupiter, et au solé.
No comments:
Post a Comment