Here's today's text by our author of the month, Florence Mary Hacquoil (FMH):
Les Avièrs
Quand ch'est que je m'mathiêthai
Des avièrs j'n'm'en vais pon aver,
Car siez nous ch'est man p'tit fréthe
Tch'est la cause de not' minséthe.
Y'a tchique temps quand i' faisait fraid
Et qu'y'avait d'la glace et d'la né,
Le p'tit balloque s'en fut dans l'pré
Et sus la mathe s'mint à drisser.
Je crai bein que l'pouorre avé
N'avait pon réalisé,
Qu'travers la glace i' tchèrrait
Et s'sait jusqu'a la pé trempé.
Quand j'le trouvîmes ses hardes 'taient g'lées
Et l'gliéchon de ses g'veux pendait,
Il avait l'onglyie et 'tait pourpre de fraid
Et ses membres n'faisaient que d'grélotter.
Mémée 'tait seuse tchi s'en allait passer,
Dans la bouonne chambre j'le mîmes au liet,
Quand l'docteu l'eut examiné
I' nos dit tch'i' pouorrait l'sauver.
Tchique s'maines pus tard quand i' fut dgéthi
Un autre malheu i' y'arrivit,
Souos les pattes du griffon i' s'enhermellit
Et san neu fa fut tous trily.
Je sommes obliygis de l'dgetter
Touos les jours du matin au sé,
S'i' continue à faithe ses dros
J'nos n'allons tous touôner fos!
No comments:
Post a Comment