In 1913, the Pains were attempting to find a suitable match for their daughter:
Great Expectations!
Ah ça! que j'lus dis, Jeudi matin d'la s'maine passée, en lus montrant un titchet que Moussieu Pérréee m'avait envié par la poste "Admit Piteur Pain Esquieur and his woman." Tchès qui s'en vint ov mé vaie les Bêtes?
Persounne ne rèspounni! Laizé continui a digotté souos la tabye ov sa bringe, sans faithe sembliant de m'avé oui; tandi qu'ma fille s'mint a ritounné en l'vant l'nez en l'air et secouant ses èspaules.
Bon! que j'dit: ou n'dites mot! J'vos offre d'allé au show d'Betes; la ou-ès qu'y'etha des douzaines de fils d'fermi en tcheute d'amouotheuses: des garçons qui savent souognyi des vaques, scié du grain, binotté du froment, smé du guano, èstendre du conré! Des garçons qui s'en vont proumné des g'niches endrét tout l'monde, cachi des querres a l'entout du 'ring,' et s'faithe photograffé a la tête de lus boeu!!
J'ethais peu paslé longtemps: nos gens n'm'escoutaient pon! A la fin Laizé m'dit. Té et tes fils d'fermi! j'n'en avaons qu'faithe, Djeu merci! Ma fille mathié un fermi! Etre oblyigie d'êcrémé des potées d'lait touos les matins, rèscauffé d'la soupe pour diné, offuche gliénné des poummes dans la rouzée, et p't'etre même allé vendre des ledjeummes au marchi! Mercie! J'avons mus qu'chenna; êsche-pas, Lonore?
J'en tais oquo a me d'mandé tchi djantre les prennait, quand Laizé s'mint a faithe a sa fille: N'oublie pas, ma Lonore, que Moussieu l'Pasteur est pour v'nin bethe-du-tée anniét! Pense a met' des flieurs partout, ta musique sus l'piano, l'Voyage du Chretien sur la tabye, et pendre "Little children, love one another" au d'sus du mitheux: j'm'en vais féthé ta blianche robe, met' d'la dentelle a ta blouse, et du pliatre-de-paris sus tes souliers d'canvas.
On hon! Ch'est d'même, que j'me fit. Ou tchillyiz l'nez sus l'fermage a ch't'heu! Ch'est des néthes casaques et des blianches mains qui vos faut. Hé bin! Ramasse-ous coumme ou pouorez! Mais pour de mé, j'm'en vais vaie tchés qu'a gagnyi la Coupe - et j'men fut en tappant du pi, coumme font touos les Pains quand tchiq' chose les contrarie.
J'passi toute l'arlevée au show; a tapé sus l'dos des gagnants, et a dithe ès perdants qu'les juges 'taient des èbuzards: i' s'ensiévait quazi trejour eunne touonée sous la tente a Mess Couillard. J'aidji a Clem Ernon a vendre sa g'niche touthâtre a un Brezilien, et il a promins d'm'apporté un cabot d'betraves pour me peine. Et pis, j'men fut vaie les flieurs tandi qu'tout l'monde 'tait a r'gardé la parade. L'Solet lisait sus l'fruit, et j'm'apperchut qu'y'avait eunne assiéttée d'reunnes qui soufrait d'la calheu: j'pensi faithe eunne bouonne action en les mettant a l'ombre - dans ma pouchette - et, ma fé, j'ronbliyi d'les r'metr' sus l'assiette en sortant. Mais n'en dites mot!
Quand j'rentri siez nous, Laizé 'tait assise sus l'bras des d'grès a m'attendre, ov san dét sus lèvres.
"Chut! Chut! qu'ou m'dit a l'ouothelle. Tu t'en vas béthe tan tée dans la lavthie. Lonore est là! qu'ou s'fit en m'montrant la porte du parleux: ov san pasteur! I' n'faut pas les dèsranji sus autchun compte! I' n'a presque pas manji a san tée; et quand Lonore y'a d'mandé conmbin d'chucre i' prennait? j'pensais qu'i s'n'allait s'èsvonni. Après l'tée, j'me sis l'vée en disant que j'm'en allais èscrithe eunne longue lettre et qu'je n't'attendais pon d'vant néthe niet (l'bouan Djeu m'pardoun'na chutte mentie) et ne v'la pus deux heuthes que j'sis assise ichin pour t'empêchi d'les disteurbé. Mais coumme j'voudrais ti don poué vaie a travers chutte porte! V'la tchi m'fait pensé a man jeune temps, quand tu m'faisais la carre, man Piteur! T'en souvains tu? j'tais appiée contre la meule du prinseu quand tu me d'mandi "Will you be mine?" et que j'respounni en t'prenant a ma brachie: t'en souvains tu?"
J'm'en souvains, all right, que j'dit! mais tchès qu'tu'as a m'dounné a mangi? J'sis plé d'sé!
Piteur Pain
Morning News 27/8/1913
No comments:
Post a Comment