Miss Eleanor Pain felt better after some medical attention and an "ocean cruise" in 1912:
Doctor's prescription faithfully followed
Après en avé r'gagni pour tchiq' temps, not pouôre èsfant r'devnait sonjearde et capricieuse. Rin n'lis pliaisait! Sa mémmée avait bieau lis lièthe des Chapitres, lis chanté des Cantiques, la proumné d'chim'tiethe en chim'tiethe pour liéthe les bieaux vérséts sus les tombieaux - rin n'sembliait poué r'lévé l'tempéthament d'notr' chiethe èsfant.
"J'voudrais galvaudé" qu'ou disait a sa méthe; "j'voudrais pilvâstchi dans des près; sauté par dessus des fossés; engambé des ruissieaux; gallopé souontre des biches; grimpé amont des bouais!"
J'nos entre r'gardaîmes tristement, ma femme et mé, quand ou pâslait d'même; et sans dithe mot, j'm'en allais, tout peineux, cherchi eunne boutelle siez l'docteu. Ch'que j'en avons, d'boutelles vieddes, souôs les d'grès; c'est a savé! Sa méthe s'est même servie des bouchons pour faithe eunne frême de portrait pour san Bazaar. Ou compte en avé tchinze shellings ov tchi oul acat'ta tchinze chents Traités "Tu ne tueras point!" pour envié en Turtchi ou-ès qui sont a s'entr' bûchi.
Mais pour en r'vené a ch't'èsfant! La drenne fais que j'fut siez l'docteu, j'lis dit: Ch'est pas tout cheunna! mais je c'menche a en avé assez, d'vos boutelles. Ma fille, n'en r'gagne pon eunne mie! et l'souô de-d'gré est plien d'boutelles; sans compté que j'sis enyét d'payi eun èstchu chaque fais pour vos blieus boutelles!
"Steady! Steady, Mister Pain; qui m'dit; n'vos marrissis pon! J'm'en vais gagni jusque siez vous en l'heu pour ostchulté vot fille; dites a Madame Pain d'prépathé tout ch'qui faut."
Quand je r'fut siez nous, et qu'j'eut conté a Laïzé que l'docteu s'en v'nait souontre mé ov eunne poutchie d'ôtis pour ostchulté Lonôre, ou n'eut que tchée a la renverse; j'eut toutes les peines du monde a l'empêchi d'avé un 'fit.'
"Ma Lonôre! que j'ai ieu tant d'peine a èsl'vé! qu'j'ai nossé si longtemps sus mes g'nors! et s'en v'né tout d'un coup l'ostchulté coumme cheunna, endrét mé, dans man bouan parleux; et offuche lis coppé bras et d'géthéts sus man soffffa, et patouôllyi mes bouans lincheurs de sang!"
Après avé ostchulté not' fille sus toutes les couôtuthes sans la faithe authun'ment sagnyi; après avé tappé sus san dos, soufflié dans l'souïes, et je n'sai tchi oquo; l'docteu dit: "Vot fille est solide coumme un Capéstre; touos ses organnes fonctionnent magnifique - ch'est san chérvé qu'est dèslotchi! ch'est tan tchi oul a l's'esprits bas. Faites la crouaîzi l'ieau!"
Right you are! docteu, que j'réspounni. Si n'faut qu'ch'la pour la r'mettre en t'nanche, je n'finâlle pas sus la dèspense! Douoche ou salée? Salée, sans doute, qu'dit l'docteu; faut qu'ou crouèse la mé.
Tant qu'a faithe, que j'dis pus tard a Laïzé; autant y'allé touôs les deux avec yi; et n'faut pas r'gardé trop ès frais pour eun fais. Nos v'la don, touôs les très sus l'bu d'la Cauchie Albert. J'nos taimes bin caudment abriées. Laïzé avait des mervelles dans san pagas, Lonôre des bâtons d'chocolat dans sa pouchette, et mé, j'avais eunne boutelle de litcheu au cas qu'tchiq'un voudrait suppé un lirmin en viage. Hi! you féller! que j'criyi a un mat'lo qu'estait a bûsotchi dans un baté - et quand j'y'eu d'visé deux minutes et que j'y'eut dit iou nos condithe, j'embértchimes touôs les trés dans san baté. J'crouèsime l'ieau d'eunne cauchie a l'autre. J'dèsbértchîmes sus l'bu d'la Cauchie Victoria; j'dounni tchinze sous et un stiffeur au mat'lo, et j'nos en r'vînmes siez nous trantchil'ment en mangeant nos provisions.
L'Docteu avait tout d'même raîson: Lonôre est diversement mus d'pis san viage en mé.
Piteur Pain
Morning News 24/10/1912
No comments:
Post a Comment