This was, as far as we know, the last Pain family story to be published. Philippe Le Sueur Mourant, the author, died the following year.
Deux d'gouts d'jerriais
Ch'né s'sa pas ocquo pour chutte fais. Après avé viédji ma jougue par très fais, manji douze livres de "lunch" galettes, feummé très bouëtées d'cigares à trente-siex sous l'chent; après avé trillyi l'tapis à Laïzé, enfuntchi ses ridjeaux, èsbrédlé chinq tumbleurs, èsdgéthé chinq (pourvu qu'i' n'les aient pon empautés) tchulliers à tée, et consummé tout l'chucre que Laïzé avait coyé contre la saison des g'lées, touos chès peules-là - pour les app'ler par lus noms - Laïesse Bilo, Freinque Podèstre, Cliem Ernon, et l's'autres, ont laissi m'n'èsléction d'en-par-où à la dernié minute. J'né s'sait pon Juge ocquo chutte bordée ichin, et l'Banc d'la Justice a perdu un bel ornement.
Et les pamphèques prétendent qu'y'a des comptes à payi! Des comptes de taxi, d'auberge, de téléphone, tch'est qu'j'en sait! Ch'est bin seux pas mé qui m'en vais les payi, chès comptes-là! ch'est bin assez des frais et des d'gats qu'j'avons yeu siez nous - sans pâslé d'Lonore qui n'en dort de dèspié - sans avé à dèsboursé d'bouans sous pour les frais d'un tas d'peûles qui n'pensent qu'a lus boudin.
I' prétendent m'avé laissi couôre parc'que j'n'éthais pon yeu d'chance contre Moussieu Rossigno! Tch'est qu'a dit cheunna? Estch' que nou sait jommais d'tchi bord que l'vent s'en va soufflié? M'n'idée est que l'publyi éthait 'té solide pour les Pains. Quand ch'n'éthait 'té qu'pour faithe pliaisi à Lonôre! chutte chiethe èsfant s'faisait eunne telle jouée d'être bétôt fille de Juge! Oulle avait déjà dounné l'sac au p'tit prècheux qui v'nait tchiq' fais siez nous l'sé, joué d'la fliute; sa méthe et yi avaient dounné lus démission d'la Chapelle et pâslaient d'joindre le chant à l'Eglyise et mé-même, j'avais fait des dèsmarches pour dév'nin membre du Clob des êscrivains, et... Et voulous m'n'idée? Ch'est ocquo ch't'ouèzé d'Caouin qu'est au fond d'tout! Jaloux d'nous, qu'il est! jaloux d'ma fille qui pèse le double de la sienne; jaloux d'ma femme viyant qu'ou peut chanté trais notes pus haut qu'la sienne; jaloux d'mé viyant qu'j'ai té faithe man dvé dans les tranchies. Ch'est ch't'ouèzé là qui nos a foui souos l'pid, j'en mettrais la main à ma femme dans eunne ticlyie d'ieau bouolliante.
Piteur Pain
Les Chroniques de Jersey 4/4/1917
No comments:
Post a Comment