La Fille Tchi Nos Faut

Né v'chîn l'texte d'aniet d'not' auteu du mais, Florence Mary Hacquoil (FMH):

Here's today's text by our author of the month, Florence Mary Hacquoil (FMH):

La Fille Tchi Nos Faut

Tout va d'travers dans not' maison,
Nou dithait que pépée perd la raison;
Car i' n'fait que dithe tréjous bein haut:
"Ch'n'est pon là, la fille tchi nos faut".

Man fréthe Philo s'est mins dans la tête
Tchi veurs se mathier et siez li d'être mattre.
I' nos amène toutes sortes de hardelles,
De laies, de fardées et de vraiment belles.

Y'en a des p'tites,des grosses et des grandes
Tchi va promener au dimanche sus les landes;
I' r'vennent sans manque à la fin d'l'arlevée
Dans la grand' tchuisine pour béthe du thée.

Pépée les r'garde d'un yi d'travers
En lus d'mandant si lus gens sont fermièrs;
I' fait grise mine quand i' lî rêpondent;
Qu'lus péthes ne s'saient fermièrs pour rein au monde.

I' veur coumme belle-fille, eune femme tchi peut traithe
Et dans les clios tout travas peut faithe.
Il dit qu'eune villaise qui n'sait travaillyi
N'est pon la femme pour un fermi.

Si pépée continue à faithe ses rouaux
Et dithe: "Ch'n'est pas là, la fille tchi nos faut"
Pour aver la paix dans la maison
I' faudra que Philo reste vièr garçon.