Tuesday 24 November 2015

1917: Deux d'gouts d'jerriais

Les Pains f'thaient d'lus tchian en 1917:

The Pain family were going up in the world in 1917:

Deux d'gouts d'jerriais
Ch'est pour vos d'mandé de n'pon vos engagi en rin, pour l'éléction d'Juge, d'vant qu'd'en avé oui pus long. Y'a bri qu'pétêtre bin qu'pépée consentitha a s'laîsi met' sus les rangs. Laiësse Bilo, Cliem Podestre, Freinque Ernon, Amice Bertran, et deus-très autres Principaux mantchis vîntes sîez nous en députation, l'aut' sé, et, s'lon coumme l'affaithe îtha, v'la tchi s'a annonçé sus les gazettes. I' sont d'un bord et d'l'autre a tâté les paraisses, sans faithe mine dé rin.

Mémée et mé, j'soummes en grande èsmeution, coumme ou pouéz pensé. J'avons dêjà décidé qu'y'a des gens que nou n'pouôra pas continué à fréquenté quand pépée s'a dans la Magistratuthe - Noblesse Oblige dans chès cas la - et j'soummes à r'gardé atouôre de nous, en s'proumnant, pour eunne maison d'belle appathence, dans un bouan quartchi, pas trop chiéthe, pas "d'basement" - mémée n'en veurt pon à autchun prix - et un "bath room" pour poué dithe que nous n'a yun quand la conversation s'adounne à touôné là d'sus.

Laiësse Bilo, Cliem Ernon et l's'autres, se sont formés en Coumiti: réunion dans not' parleux touos les siérs pour consulté les livres de Rât, mértchi les siens qui sont pour nous, et faithe eunne crouaix contre les douteurs - la jougue est souos l'sofa.

D'san bord, mémée n'perd pas eunne chance de pâslé d'pépée partout ou-ès qu'y'a eunne occasion. Toutes les femmes du Dorcas sont solides, et l'jour de l'élection, les Girl's Friendly, avec mé sus un fauteuil, f'thons l'tou d'la ville sus un trolli. Je chant'ons des hymns, et mémée conditha sus s'n'accordéon. Y'étha eunne 'flag' "Vote for my papa" et j'étha un touffét de gzettes dans chaque main.

Nos gens sont d'avis qu'pépée porte chance d'être êslu. Touos les forgeurs sont du bouan bord. Coumme dit Freinque, y'a yeu des fermiers, des marchands d'mouothue, des bâtisseurs, des drapiers, des navigants, qu'ont 'té êslus Juges: pourtchi pas un forgeux, j'voudrais bin savé?

Si je dev'nons femme et fille de Juge, dit mémée, j'n'en s'ons pas poûoris d'ordji pour cheunna! "Nous ne sommes que poudre et cendre" quand même! et je n'tchit'tons pas la Chapelle pour nos met' de l'Eglyise, coumme tant d'autres ont fait quand i' s'mettent a fréquenté la noblieche.

Si l'Caouain pâsle contre nous, faut pas l'êscouté - c'h'est qu'un faillyi ouaisé.

Lonore Pain.
24/3/1917

No comments: