Wednesday 11 November 2015

1914: Lé Cahouain et les Pains - The Owl and the Pains

Lé Cahouain êcrivit entouor la fanmil'ye Pain in 1914. I' traitit Lonôre dé "grande balivèrne", dé "monstruosité ", dé "phénomène"!

The Owl wrote about the Pain family in 1914. He called Miss Eleanor Pain a great lummox, a monstrosity and a phenomenon!

Pîter Pain et sa Laïzé sont des gens tchi n'savent pas vivre!

Aussi bein l'dithe comme de l'pensé et si Pîteur compte que v'là tchi constitue un libêle, eh bein, qu'i' m'actionne dévant la grand' Cour, et pis nou verra tch'est qu'en s'sa.

Je m'en rapporte à vous, mes chiers lecteurs, pour me dithe si j'ai raison de pâler d'même. Ou savez bein que Samedi passé je vos annonci que nou z-avait besoin de jeunes hardelles au Show à Sprinfield, pour faithe le beurre, etc.

Eh bein, v'là des gens qui n'hésitirent pas un moment, mais qui s'en furent tout drèt à Faldou interviewé le moussieu qu'avait soin d'chenna et lis présenter lus grand' baliverne de Lonore pour en faithe une dairy-maid.

I' pathaît qu'il en fut tout-à-fait enchanté, li, et sa femme n'étant pas à la maison pour le moment, il en profiti pour embraichi "à plusieurs reprises," comme i' disent à la p'tite Cour, chute monstruosité de tchi qu'san pèthe fait un tè cas.

I' n'faut pas qu'i sait bein hênitcheux ma fé!

L'av'ous tchiquefeis veue?

Enfin, le rêsultat de tout chenna fut qu'ou fut engagie pour la grande occasion, et dès que l'brit s'en rêpandit, v'là tchi causit pus d'excitation parmi l'public que si la vieille Pankhurst lyi-même avait tai attendue pour vénin aidgi à péser l'beurre.

Le matin du Show, le gardien du Pavillon fut rêvillyi par une capuchechie ès grand' portes, et quand i' fut vaie de tch'est qu'i s'agissait, i' trouvit que ch'tait l'bouonhomme Pîteur et sa fille qu'étaient dêjà là à tintamarrer pour entrer.

I' lus ouvrit les héches et Pîteur voulit li introduithe chu phénomène, mais le gardien, qui l'avait dêjà contempliée par le creux d'la clié, en avait veu assez, et i' lis touânnit l'dos et s'en fut dêjeuner.

Les v'lo entrés dans l'bâtisse, et je vos asseuthe qu'une patheille appathition à ches heuthes-là, causit une certaine sensation parmi les domestiques qu'étaient à soigni lus vaques.

Je pouorrais vos en êcrithe des pages sus les êvenements du jour, mais je m'attends bein que Pîteur a l'intention de raconter les expériences de sa fille dans les colonnes du Morning News et chein que j'appelons le "professional etiquette" me défend de pataugi sus l'terrain d'un collégue.

Et pis d'ailleurs, che n'tait pas là man intention du tout en abordant l'sujet. Chein de tchi que je m'pliains ch'est qu'opprès avait donné gratuitement l'information à ches gens-là, qui les a mins à même de l'occasion d'amener lus fille dévant l'public comme jamais n'avaient peu faithe dévant, i' n'm'en ont pas seu le moindre gré, au moment actuel je n'ai r'chu auchun ermerciements, et je vos assaeuthe que j'en sis bein contrarié. Je m'attendais au meins qu'i m'aithaient d'mandé d'aller siez ieux tchique Dimanche, mais zut! et v'là pourtchi que j'ai dit et que je répète oquo une feis, Pîteur Pain et sa femme ne savent pas vivre.

Caouain
La Chronique de Jersey 20/5/1914

No comments: