Here's today's text by our author of the month, Florence Mary Hacquoil (FMH):
Lé Cahouain
Dans lé silence profond d'la niet,
Y'a un ouaithé qu' souvent nou ouait;
Ch'est lé cahouain comme ou savez
Tchi sort dé grange, cliochi et bouais.
Jé vos asseûthe tchi travâle dû
En volant d'clios dé but à but;
I' chèrche partout auve ses ronds ièrs
Pour souothis, taupes, mulots et vèrs.
Les gens n'aiment pon entendre san cri
Tchi dans l'silence les fait frémi;
Y'a acouo d'ches supèrstitieux
Tchi craient qu'ès hommes i' porte malheu.
Il a un air de grand' tristesse,
Est èrnommé pour sa sagesse;
Mais jé d'vons bein nos en r'souv'nîn
Qué du fèrmyi il est l 'amîn.
Ch'est amusant de vaie ses p'tits
Sus eune grand' branque dé bouais jutchis,
En pliein solé i' clyinn'te les yeux,
Et d's êtres humains i' n'ont pon d'peux.
Ch'est un ouaîsé bein solitaithe,
Auve li les autres n'ont rein à faithe;
I' lus attroupent pour lé chasser
Si parmi ieux i' veint s'montrer.
No comments:
Post a Comment