Sunday 29 November 2015

A Tchi La Faute?

Né v'chîn l'texte d'aniet d'not' auteu du mais, Florence Mary Hacquoil (FMH):

Here's today's text by our author of the month, Florence Mary Hacquoil (FMH):

A Tchi La Faute?
Y'a un coupl'ye d'années pépée décidit
D'abattre touos les bouais à fruit,
Car i' voulait des tomates tchultiver
Et chutte récolte d'mande du cliai.

Je n'crai pon tch' il avait réalisé
Que d'pommes, je n'peux nullement m'passer,
Mémée a bieau en accater
Eune livre de pommes n'est rein pour mé.

Je savais bein iou en trouver
Et des chentaines j'ai avalé;
Quand not' vaisîn a l'dos touônné
Sièz li je vais ses pommes voler.

Eune arlevée qu'j'avais bouon appetit
Ses pommes à mié crues, je fut grugi,
J'eûmes des v'licots que j'aime pour le thée
Ou pâlez d'souffrances dans la séthée!

Mes gens criyaient que j'm'en allais passer
Je n'me vantis pon de chein qu'j'avais fait,
Mémée par les v'licots pensait
Que j'avais 'té empouaîsonné.

Tchiques semaines auprès chutte avarie
Et qu'les pommes me faisaient envie,
Le gardîn à pommièrs j'fus r'visiter
Auprès qu'j'eus veut not' vaisîn passer.

Quand j'eus mes pouchettes bein remplyies
Je m'assiévis souos un pommyi,
Pommes de chucre et quarantaines
J'en mangis un couplye d'douzaines.

J'tais trantchille et bein rassâsié
Et bétôt je m'mins à accliâsser,
Dans man rêve i' m'semblyait être au Paradis
Ou'est qu'il y'avait toutes sortes de fruits.

Mais subitement je ouis ouasser
Ch'tait l'grand tchian au vaisîn, ma fé!
Tchi l'fond de mes braies êrachit
Et m'gardit la comme prisonnyi.

Ch'tait mé tchi fut content de vaie
Le vaisîn dans san gardîn entrer,
Mais quand i' m'nichit de m'trainer en cour
Je m'mins bein vite à crier au s'cours.

Ne v'la sa bouonne-femme tch'arrive en couothant
D'mandant à s'n homme s'il avait perdu les sens,
Quand i' 'tait mousse, ou lî ramémouethi,
Que siez san péthe étou des pommes i' volit.

Tout chennechin ne s'sait pon arrivé
Si pépée s'était contenté,
De fermer comme i' faisaient dans l'passé
Et ses pommièrs et vacques garder.

No comments: