Quand nou bouoillait l'hielle à La Rocque aut'fais

 Quand nou bouoillait l'hielle à La Rocque aut'fais

 

À la fîn du stembre, eune fais l'temps 'tait dév'nu trop rude pouor aller au baté, les pêtcheurs dé La Rocque aut'fais mettaient un jour à part pouor faithe dé l'hielle ou, comme nou disait, bouoilli l'hielle. Tout l'êté, d'pis l'èrnouvé, touos les pêtcheurs avaient mîns d'côté lé faie d'châque haû (ou tchian d'mé) tch'il' avaient prîns, et ofûche étout du faie d'autre tchians d'mé, etc. Quand don v'nait l'jour pouor dêhaler toute chutte pile dé faies pouôrris - lé jour dé l'hielle - faut d'mander s'i' y'en avait, d'l'odeu! Assez, comme dit la vielle expression, pouor înfecter les sept bélettes!

 

Tout 'tait mîns dans eune grand' chaûdgiéthe sus un grand trépid, à l'abri dans la carre au haut d'la montée d'La Rocque. tout l'monde allaient et v'naient tout l'jour, et y'avait souvent deux chaûdgiéthes sus l'feu, ou même trais. Ch'tait un jour tout partitchulyi. Les avièrs s'amenaient là l'tou, bein seux, et prannaient part dans l'êbrouha. Nou-s-alleunmait les feux d'bouonne heuthe, dé bouais et d'vrai sans doute, et pis la bouoillêtuthe sé faîsait tout l'jour, jusqu'à qu'les faies fûssent en chitchettes, comme les vièrs disaient. Dans l'couothant du jour, eune fais l'affaithe bein en allant et les feux bein âpres - mes bouonnes gens, tchi r'tûnfîn! Tout l'vaîsinné en' 'tait remplyi, dé ch't' înfection tchi couochait! Mais pèrsonne né lus pliaignaient, car ch'tait eune vielle couôteunme et pis, bein nécessaithe. À l'appraiche dé l'hivé châtchun savait tch'i' faudrait tout pliein dg'hielle pouor les longues séthées, à brûler dans la crâssets. I' n'y'en restait bein seux dgéthe fort dé l'hivé dé d'vant.

 

Mais chein qu'les avièrs du vaîsinné aimaient l'mus, ieux (l'odeu n'les gênait pon!). ch'tait d'pouver couôrre à travèrs la feunmée, aller et v'nîn sans cêsse. Car la bouoill'lie dé l'hielle faîsait eune forte néthe feunmée, et bein êpaîsse, comme un tchèrbonnyi!

 

À la fîn du jeu nou m'ttait l'hielle et boutelles prête pouor l'hivé. Et jé m'rappelle qué quand j'tais mousse man péthe avait acouothe eune boutilyie dé ch't' hielle tch'il avait gardé d'san janne temps, du temps tch'il avait couothu lî-même en plieine odeu lé travèrs dé la feunmée.

 

G.W. Bertram

Vèrsion Jèrriaise d'FLM

 

Commentaithe dé FLM: Ch'la s'faîsait à chutte saison ailleurs dans l'Île étout. Mais, sans doute, bein du monde bouoillaient lus hielle ieux-mêmes siez ieux. Eune vielle expression entouor deux pèrsonnes ou fanmil'yes, ou pus, tch'accordent bein ensembl'ye est: "I' bouoillent dé l'hielle ensembl'ye". Et nou dit étout des gens tchi n'accordent pon du tout auve cèrtaines aut' gens: "I' n'peuvent pon bouoilli d'l'hielle ensembl'ye". Vielles expressions tchi sont acouothe en usage ouaithe qué chutte couôteunme sait pèrdue d'pis longtemps. Disons qu'la bouoill'lie dg'hielle sé faîsait probabliément jusqu'à 1870 ou 1880. Nou s'en sèrvait sustout, dé ch't' hielle, pouor les crâssets tchi donnaient la seule leunmiéthe qué nouos anchêtres connaissaient.