Va-t-en Pierrot!

Né v'chîn l'texte d'aniet d'not' auteu du mais, Augustus Asplet Le Gros:

Here's today's text by our author of the month, Augustus Asplet Le Gros:

Va-t-en Pierrot!

Va-t' en, va-t' en Pierrot!
Vei-tu? la lune est l'vèe;
Si tu t'en vas, je n'dirai mot,
Que toute l' arlevèe
Tu t'es landrè ichin,
Au lieu de t'mettre en k'min
Coume un buon houme devrait faire:
Je n'ai, ma fei, q'd'en braire.

Va-t'en, va-t'en, je l'veurs:
Tu verras si tu reste,
Bétôt je s'rai d'mauvaise humeur;
Tu-es pière que la peste;
Va-t'en, va-t'en j't'en prie,
Men dou, men dou, d'la vie,
Coume un buon houme devrait faire:
Dévrai, je n'peux me taire.

"J'm'en vais, j'm'en vais, Bètté:
Et y-a-ti si grand prêsse?
Tu n'en veurs pon, je l'vei, d'auv' mei,
I faut donc que je t'laisse,
Men puore escllave, hélàs!
Tu m'traine pas à pas
Coume un ch'va q'nou mène à la fere;
Ch'est à ne pas y crere."

Va-t'en, va-t-en, valèt!
J'en sis enorphantèe
De t'vêir ichin jusqu'à la nièt:
Je sis toute êffritèe
D'entrer si tard siez-nous,
Nos gens en d'vis'ront tous;
Et si v'nait à l'saveir, men père
Ne me pardon'rait guêre.