Friday 2 October 2015

Lé Chant des Vraitcheurs

Né v'chîn l'texte d'aniet d'not' auteu du mais, Augustus Asplet Le Gros:

Here's today's text by our author of the month, Augustus Asplet Le Gros:

Lé Chant des Vraitcheurs
Happez vos frouques, mes garçons,
Né v'là la mé tch'est quâsi bâsse.
Si j'nos ténons dans nos maîsons,
À nos landrer la mathée s'pâsse.
I' y'a du vrai pourtant au pliein
Si nou-s'en veurt i' n'y'a qu'à prendre!
Ah! chu bouôn vrai, nou l'sent dé liain,
Havo! N'en v'lo!
Ah! chu bouôn vrai, nou l'sent dé liain,
Havo! N'en v'lo!
J'pêqu'thons lé vrai tchi fait la chendre.
Houras! Houras! Houras!

Si l'temps est fraid, j'nos êcaûff'thons;
Un bouôn vraitcheux n'craint pon d'môtuthe.
Allons, valets, jé travâl'lons.
Si l'ieau nos veint à la cheintuthe,
À nos fouées d'plyîse jé nos r'sequ'thons.
Dé chu bouôn vrai i' n'y'a qu'à prendre!
Vite en hèrnais et j'en pêqu'thons,
Havo! N'en v'lo!
Vite en hèrnais et j'en pêqu'thons,
Havo! N'en v'lo!
J'pêqu'thons lé vrai tchi fait la chendre.
Houras! Houras! Houras!

À tigue dé corps, à flieur dé bras,
I' faut châtchun foui sa carre.
Du labouotheux, lé dû travas
Vaut chent fais mus qué l'or en barre.
I' n'y'a pon d'vrai pouor les pièrcheurs,
Mais i' y'en a pouor tchi veurt prendre.
Houras! houras! pouor les vraitcheurs,
Houras! Houras!
Houras! houras! pouor les vraitcheurs,
Havo! N'en v'lo!
Pêtchons lé vrai tchi fait la chendre.
Houras! Houras! Houras!

No comments: