Lé Vouêteunme

Né v'chîn l'texte d'aniet d'not' auteu du mais, Augustus Asplet Le Gros:

Here's today's text by our author of the month, Augustus Asplet Le Gros:

Lé Vouêteunme

V'là nos paithes et nos poummes
Bein louochies, nos gens;
Janmais dé mémouaithe d'houmme
Avêmes veu d'ité temps.
Ch'est lé Vouêteunme
Tchi fait voler tout coumme la plieunme.

Branque et fielle, en achies,
Font dé l'hèrbe un tapis;
Bein des pots dépichis
Tchaient partout à nos pids.
Ch'est lé Vouêteunme
Tchi fait voler tout coumme la plieunme.

Dé la brise tchi vente
Faut teurtchi ses gliots;
Car si nou n's'en d'mente,
Tout s'en îtha en mios.
Ch'est lé Vouêteunme
Tchi fait voler tout coumme la plieunme.

Y'étha pus d'eune êtchête,
Et not' pus grand sapîn
Veint dé s'câsser la tête
Tout en travèrs du c'mîn.
Ch'est lé Vouêteunme
Tchi fait voler tout coumme la plieunme.

Rein au vent n'êcappe;
Tout s'en va en morcieaux;
I' faut s'mettre à la cape,
Ou j'éthons dé tchi sus l'dos.
Ch'est lé Vouêteunme
Tchi fait voler tout coumme la plieunme.

Y'en a-t-i du saccage,
Et dé tchi ramather;
Y'étha du ramâssage,
Et dé tchi èrpather.
Ch'est lé Vouêteunme
Tchi fait voler tout coumme la plieunme.