Nos v'la finis!

Né v'chîn l'texte d'aniet d'not' auteu du mais, Augustus Asplet Le Gros:

Here's today's text by our author of the month, Augustus Asplet Le Gros:

Nos v'la finis!

Nos v'la finis! et la seraïe
La v'la chutte bouonne feis là passaïe!
J'espethe qu'ous allaiz bein m'creithe
Que j'avons fait tout pour vous pliethe,
Du mains autant que j'l'avons peu;
Si au contraithe je n'avons seu
Vos amusai, sachiz nous graï,
Car ch'nest pas manque de volontaï,
D'avei chantaï, d'visaï d'not' mus.
Et nou n'peut faithe d'abouon pus.
Ous êtes peut-être bein enniais
De tout not drole de palvathin
De tout not' chant, not' bargouaichin;
Je crei tout d'même qu'ous y r'veindraïz.
Je peux vos dithe tréjous la d'sus,
Qu'la précheine feis je faithons mus,
Mais le v'lo l'heuthe vraiment tchi presse,
Je crei, bouones gens, tchi faut que j'cesse,
Chatchun s'en va cherchi son liet.
Je vos souhaite donc à tous bouonne niet,
Que la ponceresse n'vos trouble pon,
Ch'est la trejous tchique chose de bouon;
Ensemble achteu, j'allons chantaï
God save the queen et nos s'parthaï.