Here's today's text by our author of the month, Augustus Asplet Le Gros:
Ma Catte
Ma catte et mei près de notre âtre,
Je nos tenons auvé un buon feu;
Est'che êtonnant que j'sais cadâtre,
Assise ichin à men fin seu?
Hautant parfeis, ouvrant ma cauche,
Prenant du sno pour m'êvillir,
Ma catte rounant à ma gauche,
Je n'ouions pas l'boués pétillir.
Ou haute ètout, baissant la tête,
Car jé faisons si p'tit d'tiné;
Pis ou s'rêville et m'fait la fête,
Se frottant contre men d'vanté.
Les criquets vont de l'âtre à l'aire.
I n'l'êvill'ront pon de leux brit!
Ou dort trop ben, ils ont biau faire,
Tànèe coume oulle est sus men pis.
Seul's, les suoris dans la cônière,
La font tressauter d'temps en temps;
Ou n's'en va pon achteu les sière;
Ou dort! oulle a ben pus d'avis.
Ous riez! au moqueux la moq'rie,
Ben rira l'chen qui rira l'drein;
Ma catte n'a pon tant d'niais'rie
Coum' ben des gens qu'i s'troubllent d'rein.
Ma catte a d'la philosophie!
M's-èfants, en avous pus que l'yi?
J'vei trop par votre philomie,
Qu'ous vos tormentèz pus l'esprit.
No comments:
Post a Comment