Tuesday 13 October 2015

La Ruette à la Vioge

Né v'chîn l'texte d'aniet d'not' auteu du mais, Augustus Asplet Le Gros:

Here's today's text by our author of the month, Augustus Asplet Le Gros:


La Ruette à la Vioge
Tu-es lâdre-piercheuse, Mallé;
Tu n'finiras jamais ta cauche:
S'tu continues, je t'dirai,
Tu-iras les pids nuds coum' Jean Bauche.

L'matin quand tu k'menche à ouvrer,
Nou dirai qu'tu-érais une achie;
Mais si nou la r'garde le seir,
Ou n'est pon d'abouon pus avanchie.

Tu t'leves quand l'travas est fait.
Au lieu de t'dêpêchir pour traire;
Et oprès qu'tu-as bein dêjeunè,
Tu t'tiens à t'landrer et rein n'faire.

Tu n'te mêts en souci de rein,
Et tu vei que je negre ma vie;
Si du surcrouès de travas nou veint
Ah! devrai, tu n't'en genes mie.

Je n'sai qu'est qu'en d'veindra de tei,
Tu devrais, ma fille, aveir honte;
Ah! souvent, quand ainchin je t'vei,
Creirez-tu que la rouogeur m'en monte?

Te t'nant à guêper par ten us,
Qu'est l'houm' qui t'voudrait, ma hardelle:
Le pouore houedre en s'rait-ti de mus
Tu lairais sa k'minse ne bredelle.

Un houme à casaqu' sans boutons,
Hélàs! je l'pllaindrais l'pouore apôtre,
Auv' des braies qu'ont perdu leux fonds,
Sa femme n'pouvant l's-y-couôtre.

Ses hardes de fin dra tout neu
Ne s'raient qu'un biau lopin d'chiquèttes;
Et chein qu'en est l'pus biau du jeu,
Les sous sortiraient d'ses pouchettes.

Vaut mus être lièes d'rouog's fremins,
Rester vier garçon pour la vie,
Ramasser la baue dans les k'mins,
Maingir du pain neir coum' la sie.

Tu di que tu as ma dans ten dos,
Que chun là partout te pénetre,
Et tei forche à prendre du r'pos:
Ne s'rai-ch' pon, di mei, un noeud d'petre.

Nou-s-a biau te crier sus l'co,
Ch'est "chou! chou', la bête n'en bouoge";
Les cheins qui pass'ront par illo,
Diront: V'chin la ruette à la Vioge.

Et à chent ans d'ichin nou dira;
Ichin demeurait la hardelle
Que jamais sa cauche n'ouvra;
Ch'est ichin la celebre v'nelle.

No comments: