Not' Vier Fusi

Né v'chîn l'texte d'aniet d'not' auteu du mais, Augustus Asplet Le Gros:

Here's today's text by our author of the month, Augustus Asplet Le Gros:

Not' Vier Fusi

Not' vier fusi, not' vier fusi,
Quouequ' i seit tout couvert de roui,
Je vos dirai que j'y tcheins pus,
Et que je mets pus d'valeu d'sus,
Que si ch'tait iun tout neu, ringant,
Ov' les pus grands perfection'ments.

Fusi Chass'pot, fusi Minié,
Ou tout aut' fusi que che seit
Tch'a 'taï fabritchi, inventaï,
Ou avec tchi nous ait tiraï;
D'not' vier fusi je fais 'taï cas,
Qu'à mes iers i's n'le valent pas.

Nou l'f'rait bein servi à la chasse
Pour tirai canard ou becasse,
Si d'aut' fusi nou n'avait pon,
Quouequ'i seit de la viell' faïchon
Ov' une pliaque à pierre-à-feu
Coum au temps passaï nou-s-a veu.

Mais tant les Chasseurs qu'les Soudards
N'en badraient pon, je crei, deux liards:
Nou veurt achteu de tchi nouvé;
Et not' fusi n'est rein d'bein bé,
Car le pouor' vi a fait san temps,
Et sen habit n'est pus r'lisant.

Et malgré tout chonna j'y tcheins:
Man grand-grand-père l'prit des mains
De iun de ches soudards Français
Tchi voulur'nt battre les Jerriais
Dans chu bein memorablle jour
Quand i' vinr'nt ichin ov' Rull'court.

Vère, tréjous le six d' Janvii,
Tu m'rappell'ras, o vier fusi;
Tu m'rappell'ras aïtout Pierson
Que jamais nou n'oubliera pon,
Li tchi en combattant mouorrit
Pour saufgardai not' p'tit Jerri.

Nennin, jamais nou n'toubliera
Tandis que l'monde durera:
De ta bravoure et tes explouaits,
De touos tes noblles et glorieux faits,
Les vielles gens en touos les temps
Esmervill'ront lus p'tits esfants.

A grand' tcherrue et à sciérie;
Au coin de l'âtre, à la villie,
Quand buche et chouque au feu petillent,
Quand les critchets crient et sautillent;
Veisins et amins réunis
Te f'ront le sujaït de lus d'vis.

Not' vier fusi, not' vier fusi,
Quouequ'i seit tout couvert de roui,
Nou n'le mepris'ra vraiment pon,
Quand i n'ferait du brav' Pierson,
Et du celèbre six d'Janvii
Que tchique feis nos resouv'ni.