Marion

Né v'chîn l'texte d'aniet d'not' auteu du mais, Augustus Asplet Le Gros:

Here's today's text by our author of the month, Augustus Asplet Le Gros:

Marion

Je voudrais me marier
Se je pouvais trouver femme:
Mais j'ai peux de m'allier
A la fille qui s'rait dame
Buonne à pllèchir sus men ais:
J'ai pour tout ben mes diex deights.

Manon Jean est fraiche et belle,
Ses c'veux sont du pus biau jais,
Et j'aime assèz la hardelle,
Mais! il y-a tréjous un mais -
Oulle a chouési Pierre D'nize
Qui d'meure à la rue Jutize.

Betté Giot du Mont Vèrrin,
A l'égllise m'fit un cllin;
Ch'n'est pon ainchin que nou m'happe:
Je n'veurs pon que nou m'attrappe;
Betté Giot, marche ten c'min,
Je n's'rai pon ten buon amin.

Nenné l'Dain d'la ville es Ph'lippes,
A la tête au brimballet;
Je n'en bâdrais pon deux pipes,
Ou n'fait qu'faire du fllanèt;
Oulle est pière que Jean Bauche:
Ou n'a ni sôlé ni cauche.

Souky Anq'til est gog'lue,
Nannon Rose est sans êcus,
Jeann'ton Fiott, puore imânue,
De travas n'en fait pon pus
Qu'un cat qui s'tient près du feu
Du matin jusqu'à méjeu.

Mai j'oublie! au pid d'la ruette,
Vit la fille du Mougni,
Et queique ou marche en Pirette,
J'vei du pain sus sen râclli:
Jean Tourgis a un mènage;
Si j'prends sa fille je s'rai sage.