Sunday 18 October 2015

Maître Damian

Né v'chîn l'texte d'aniet d'not' auteu du mais, Augustus Asplet Le Gros:

Here's today's text by our author of the month, Augustus Asplet Le Gros:

Maître Damian
Maître Damian – l'avons connu?
- À St.-Aubin gardait l'école;
Quand i lattait, i lattait du,
Je vos en donne ma parole:
Ah! j'vos enshaille, i payait chi
Qu'osait jamais l'mëttre au defi.

Maître Damian! il en avait
Presqu'un caboté dans la tête;
De chut esprit, de chu savé,
Qu'il en devenait quasi bête;
Il en 'tait quasi biscasië,
Car trop d'esprit quiq'feis vos niët.

Maître Damian! il apprenait
La division et la pratique;
La reglle d'treis il ensignait,
Et un p'tit miot d'mathématique
Pour condire en coutre ou baté
A Guernesy ou Serq tout dreit.

Maître Damain il vos montrait
A êpp'ler, chiffrer, et bein lière,
La "vraie méthode" et le bâissé,
Et chein qu'était pus d'gièz feis pière,
Grinchait sus sen violon l'vier chent,
Ou "Ah! vous dirai-je, maman."

"Maître Damian," s'non li disait,
"Vos êcoliers n'vos craignent mie."
"Si n'mei craig'nt pon", i répondait,
"Les bonjârrons! ah! de ma vie,
Je n'les crains pon devrai nintout."
V'la chein qu'ous aviez tout d'un coup.

Maître Damian! son temps est hors.
Hélàs! qu'est que ch'est que la vie:
Elève et maître, tous son morts.
Il avaient ieu pus d'une achie.
Ah! s'ous l'aviez jamais connu,
Ous ériez seu qu'i lattait du.

No comments: