Qu'est Qu'est Tcheît?

Né v'chîn l'texte d'aniet d'not' auteu du mais, Augustus Asplet Le Gros:

Here's today's text by our author of the month, Augustus Asplet Le Gros:

Qu'est Qu'est Tcheît?

Ah! qui camas et qui tinet,
Tout' la maison 'tait en émouet,
Manon, Suson, toute' boul'versaïes
Coumm' s' i' s étaient enchorchelaïes.

La Manon faisait la longu' fache,
Longu' coumm' d'ichin au but d'la cache.
Suson trembliait ov' les yeux couis,
Ne se t'nant presque sus ses pids.

Manon disait qu' oulle aveit oui,
Oulle en 'tait seure, un averti
Deviers miniet, et un' 'taï brit:
Quiqu' s-uns vraiment allaient mouorri'.

Suson disait que ch'là n'tait pon,
Y-avait un sort sus la maison.
Ch'tait les chorchiers - et ou verrait
Que dès demain leux lait tououn'nait.

Enfin la s'maine se passit
Sans que nou ouiss' le moindre brit,
Quand, il leux print un évrédin
D'ouvri' l'hôlouoge un biau matin.

Ch'etait la p'zaïe de chutte holouoge
(Car nou ouait tout quand rein ne bouoge)
Qui dans la niet aveit tcheît bas,
Et aveit fait un' 'taï frédàs.