Wednesday 21 October 2015

La Sornette de Betté Roué

Né v'chîn l'texte d'aniet d'not' auteu du mais, Augustus Asplet Le Gros:

Here's today's text by our author of the month, Augustus Asplet Le Gros:

La Sornette de Betté Roué
Ah! quand nou-s-a la nonantaine,
Nou n'est pon coum à dgèz-sept ans:
Dans men jane temps j'allais quédaine,
Mais j'm'en vais achteu hantchinant.
Un rein devrai, l'creirious, m'bouleverse,
Et j'ai d'la peine à gabaré,
Car j'en ai ieü bein des traverses
Et j'ai ieü pus d'un au-m'sespé.

Ch'est étonnant que je n'seis morte
Oprès tout chein qu'j'ai enduraï:
Ah! j'en ai veü de bein des sortes,
Pus qu'je n'pouorais vos dire aniet;
Tout d'même i y-a ieü bein des choses
Qui m'ont donnaï jouée et pliaisi,
Car dans la vie il y-a des roses,
Et d'temps en temps le soleil lit.

Je m'ersouveins quand j'étais jane;
Que j'allion tchique feis au lanchon;
Et j'aimais bein ma bordaie de fane!
De trop sérieux je n'les aime pon.
Il y-en a qu'ont une si longue fache,
I semblle qu'chest des condamnaïs
Qui véeent déjà sus lieux la hache
Ov qui i s'ront guillotinaïs.

Je peux bein rire ovec les autres,
Y-a-t-i du ma d'aver du gi?
Et pour êt'e bouons coum des apôtres,
Faut-i cachi même un souori?
La vraie r'ligion, a dit St. Jacques,
Est d'suotnin veuve et orphelin,
Et dans la vie s'garder sans taque,
Et d'pardonner à sen ennemin.

Car il y-en a qui n'peuvent pon rire,
Des gens qui s'créent, helàs, sans d'fauts,
Tchi n'manquent vraiment pon de dire
Du mâ des gens drière lus dos;
Si n'en savent pon ils en inventent,
Quand ieux-mêmes i devraient s'laver;
Est-che que les cheins qui ainsi mentent
Créent pouver par là prospérer?

Coum j'vos ai dit quand j'étais jane,
Pour ervenin à nos moutons,
J'aimais aitout ma bordaïe d'fane,
Couorant souvent par vaux, par monts;
Quand i fallait aller en ville
Je montais sus not' vielle juments,
Car dans mon temps garçons et filles
Ainchin à ch'va allaient bravement.

Trottin-trottant, bouonne criature,
La femme allait drière sen houm;
Nou n'allait jamais en voéture,
Et nous s'griait de charme tout-coum:
De St.-Helié à la Vallaïe
La grève était le seul quemin,
Nous arrêtait pour la maraïe,
Quand nou cherchait à s'en r'venin.

Quand nou montait sus sa kédolle,
De ches patouolles nou n'avait pon,
Les houms allaient dans lus k'minsolle
Les femmes en bedgaine de molton;
Un couossi tenait à la selle
Sus qui la femme s'assiévait d'sus,
I n'y-avait pont d'autre ativelle,
Et pouvait nou êt'e jamais mus?

Le Lundi d'Pâques i y-avait fête,
Nous allait tous au vier Châté,
Et ch'estque nous trottait sus sa bête,
Nou galopait et galvaudait.
Quand i y-avait grand compagnie,
Ch'est là qu'il y-avait du pliaisi;
Et l'chein qu'était oprès d'sa mie,
Faut-i d'mander s'il était fii!

Le jour de Saint-Jean y-avait fère,
I's rôtissait un boeü entchi;
J'y-alli une feis avec man père,
Et d'pus d'une sorte là je vi;
Au sei aitout y-avait sounenie
Ouest qu'nou chantait et nou dansait:
A chu Saint-Jean, mon doue d'la vie,
Qui lopin d'monde que nous viyait!

Mais, hélas! qu'est-qu'chest don qu'la vie?
Mes biaux jours ach'teu ne sont pus,
Et mé je s'rai bétôt finie,
Car le passaï ne r'veint à nus.
Cheinqu'nou voudra qu'ichin nou faïche,
Qu'nou-s-aie bouonne chance ou bein aheurt,
D'autres bétôt prendront vot' plièche:
Nou nait, nou vit, et pis nou meurt.

Nou peut bein rire quand i faut rire,
Et quand i faut lermer plieurer,
P'tit badinage et faire et dire,
Et quand nou-s-est joyeux chanter:
Car il y-a un temps pour toute chose,
Ainchin que l'a dit Salomon;
Et s'nou-s-est sérieux pour une pose,
Une aut' feis iéra rêvillon.

Ous diraiz p't-ête bein que je c'menche
A ne saver pon tout chein que j'di;
Ou bein ous m'creraïz en éfanche,
Que viscaziaï est men esprit:
Mais en vos contant mes sornettes,
J'ai quique feis dit la véritaï
Es jeunes aviers, es jeunes fillettes,
Et j'espère qu'ils ont profitaï.

Ous m'pardonneraïz, lecteur, j'espère;
Et si par chance ous êtes mârri,
Ch'est qu'le bonnet peut bein vos faire,
Et ch'est pour vous qu'il est chouési;
Mais s'ous êtes coum je vos cré sage,
Ous en riraïz aitout ov mé,
Car il en affole à toute âge,
Aussi vrai qu'jai nom BETTÉ ROUÉ.

No comments: