Tuesday 27 October 2015

Le But d'la Vie

Né v'chîn l'texte d'aniet d'not' auteu du mais, Augustus Asplet Le Gros:

Here's today's text by our author of the month, Augustus Asplet Le Gros:

Le But d'la Vie
Tu dors ach't-eu de ten drain soume,
Car ch'est la le sort de tout houme,
D'entrer par l'us d'la mort.
Oprès l'long viage de ta vie,
Ta course ichin-bas est finie:
Tu-es arrivè au port.

Et tu-en as veu de bein des sortes
Durant les annèes qui sont hortes;
Car ch't-î-là qui coum' tei
Est parvenu à si grand âge,
En naviguant sus sen passage,
Dans bein d's-êtats se veit.

Pllie et bllu ciel, soleit et nuage,
Calme et gros temps, pus d'un orage,
Sus ten long k'min tu-as veu;
Et bein des feis marèe contraire
Qui n'a pon manqui de te nière,
En gabarrant tu-as ieu.

Tu dors en paix en d'sous d'la biête,
Et l'herbe creit au d'sus d'ta tête,
Mais t'n-esprit est là-haut;
Et si j'voulons ichin tei sière
Dans l'êtreit k'min, la vraie quérière,
Je tel r'verrons tantôt.

No comments: