Monday 26 October 2015

Mèrgot Mèrgotton

Né v'chîn l'texte d'aniet d'not' auteu du mais, Augustus Asplet Le Gros:

Here's today's text by our author of the month, Augustus Asplet Le Gros:

Mèrgot Mèrgotton
Mèrgot Mèrgotton, qu'oulle est belle,
J'n'en connais pon qui saient comme lli ;
Oulle a des yièrs comme des êtelles,
Et san p'tit r'gard est doux comme mïi ;
Ses lèvres sont couleur de rose,
Et san p'tit nès est ertroussè.
Nou' l'embrachechait sinon qu'nou' n'ôse -
Ou' n'avez veu jamais d'itè,
D'autres vrainment je n'connais pon
Qui saient comme Mèrgot Mèrgotton.

Je la demandit en mathiage,
Mais ou me dit: je n'té veur pon.
- Ah, que les filles sont volages!
J'voulus savai si ch'tait tout d'bon,
J'l'i dis qu j' l'i sethais fidèle,
Ou' n'voulit pon ouï rein d'itè -
Ou m'dit q'j' fthais mus "d'patchi mes velles";
Et mé j'm'en fus comme tchan fouôttè,
Avec tout chla j'n'en connais pon
D'autres comme Mèrgot Mèrgotton.

Pourtant, pourtant; j'éthais aimèe,
Ma belle Mèrgot Mèrgotton -
Les hèrpins par té préféthès
Au tendre amour ne donnenont pon
Bonheur et jouaie à tan mênage -
Ov des sous nou' peut mouothi' d'faim,
Je chèrchethai fille pus sage;
" 'y a d'autres meûnièrs que Jean Le Dain,"
Et accouo, accouo, n'y en a pon
Comme té, ma Mèrgot Mèrgotton.

No comments: