Here's today's text by our author of the month, Augustus Asplet Le Gros:
Le C'min d'Fé
Chein q'Jean et Manon virent à l'inaugurâtion
Et avous oui, men doue d'la vie,
Chein q'nou-s-a faït dans not' Jèrry?
Manon, ma femme, en est ravie,
Et mei, j'en perds quasi l'esprit!
Qui n'le verrait nou n'pouorrait l'creire,
Et nou n'sait pus à qui s'en t'nin:
Leux tête tuon'rait, ma fei, vère,
Si nos vieill's gens allaient r'vénin.
Quand de nos iers je viyons couore
Un p'tit c'min d'fé dans notre Ilot:
(Ouestque l'esprit, devrai! se fouorre;)
Faut que l'houm seit shorchi ou bein fo.
Et pis ch'est de si drôl's de carrosses,
Les gens y sont drol'ment pliéchis,
Traînës sans boeus, ni ch'vaux, ni rosses;
Je n'sai coumest qu'i sont cachis.
Et i s'en vont coum' la fumëe
Qui fait pouf! pouf! un divers brit,
En sortant de chute chim'née,
Les ouies m'en cônaient quand je l'ouit.
La! la! r'gardëz, le v'la qui file;
Ous n'avez j'té que la veue d'sus,
Que le v'la presqu'en ville,
Et ous ne l'viyiz déjà pus.
J'm'en fu l'aut' jour à l'ouverture,
Manon voulut y v'nin auv' mei;
Et tout n'était que mouoillâture,
Mais l'temps se mit un p'tit sus l'bé.
Je vimes un tas de chu grand monde,
Moussieu l'Bailli, le Gouverneux,
L'Doyen, l's Etâts, (tout ch'la m'confonde,)
Et pis un grand lopin d'mêssieux.
Yavait des soudards, d'la musique,
Des filles atou leux biaux habits,
Couleu de rose, couleu d'soucique,
Et des garçons bein habillis.
Un tas de femm 'sétaient juquies
Sus iun des hernais du c'min d'fé;
I fut sus cant, les v'lo droquies:
Ah! y en eut-i de chu tiné.
I fallait les véir rouoller vite,
Je me r'touoni quand j'oui le cra;
Mais de bonheur, i n'y-eut q'l'êffrite:
Il avaient ieu pus d'peux que d'ma.
Tout' l'arlevée je nos proum'nimes,
J'èrais voulu monter dans l'train,
I v'nait d'arriver quand je l'vimes,
Mais Manon m'dit: “Men Jean, je crains.”
Je n'vouli pon la contredire,
Je viyais bein qu'oulle avait peux;
J'lié dis: “Depis que tu l'desire,
Je n'irons pon accouo nos deux.”
Partout, partout, i y-avait foule
Dans chu pouor petit St.-Aubin;
Ch'tait boule et pousse, et pousse et boule,
Nou n'pouvait pon se faire un c'min.
Le seir, ah! ch'était gièz feis pière,
Jamais je n'avais veu d'ité;
Un tas d'avier 'taient à vos sière,
Que j'en 'tais tout enorphantë.
Ch'était à drouete et ch'tait à gauche,
Coum' de bouons coups de pistolët;
Un cracker me brûlit ma cauche,
Une autre quit sus men bounët.
Manon en 'tait toute effritëe,
Le feu happit sen cotillon,
Sa robe en fut ettout trallëe;
Il ieut un divers rêvillon.
Oulle en était si boul'versëe,
Que j'la ménit siez Mess Coudray,
Jusqu'à-c'q'ou fusse rasseurëe;
Et pis ou r'sortit quantë mé.
Il ieut ettout sus la cauchie
Des fireworks, ah! y-en eut-i?
Nou-s-'tait en dangi de sa vie;
I n'y-avait pon bein du pllaisi.
Et chu pllaisi est ouestqu'nou l'trouve,
Ch'est là un diton qu'est bein vrai;
I n'sait pon qu'estq'ch'est qui n'éprouve;
Qui reste siez-sé rein ne veit.
J'y perdit partie d'ma journëe,
Je n'me r'pens pon de y-aveir 'té,
Ditë ne s'veit pon chaque annëe,
Et pis devraï, ch'qu'est faït est faït.
Mais j'oubliais la fine de l'histouère,
I faut vos conter jusqu'ua but,
Car ch'était bouon, ah! ma fei, vère;
Y'en a-t-i qu'ont l'esprit pointu.
Il ieut un gaillard que j'oui dire,
“L's Etâts iront à la vapeur;”
Et je n'sai pon si voulait rire,
Mais che s'rait là un grand bonheur.
No comments:
Post a Comment