Quand l'caud solé veint scoltchi par siez mé

Né v'chîn la poésie d'aniet, tch'appathaît ichîn pouor la preunmié fais, d'not' auteu du mais, Geraint Jennings:

Here's today's previously unpublished poem by our author of the month, Geraint Jennings:

Quand l'caud solé veint scoltchi par siez mé
à êpier entre les lattes des vénitiennes,
à paûtrîndgi ma pé auve ses jaunes dés,
ch't affronté voudrait m'chuchoter les dreines:

i' veint contepéter chein qu'nou fait ès grèves;
des hardelles tchi jopîntent en bikinis;
les cheins tchi lus graiethont d'jouaie d'vant qu'i' s'lèvent;
les vaîthîns tchi sont entre-enmouothachis.

I' s'est sîlyi ès chambres entre les ridgieaux;
les f'nêt's lî sont un us à sinne dé jeu.
Il alleunme la rouogeu dé honte ès jaues,
en êcliaithant la jouôthie d'gammes à deux.

I' m'pâle entouor les cheinnes tch'ont l'pid ligi,
entouor les cheins tch'en rentrent siez ieux, heûthis,
tch'ont muchi lus amours duthant la niet,
bein heutheurs d'êt' carêssés par l'solé.

Mes vénitiennes sont freunmées pouor achteu.
L'solé est un scoltcheux tchi bat la banque;
des gambes sont ouèrtes à atchilyi sa lueu;
et ses jaunes dés en paûtrîngu'thait des hanques.