Not' Danme des Pas

Né v'chîn la poésie d'aniet, tch'appathaît ichîn pouor la preunmié fais, d'not' auteu du mais, Geraint Jennings:

Here's today's previously unpublished poem by our author of the month, Geraint Jennings:

Not' Danme des Pas

Ou dansicotte en touônnitchet;
ou fait des révéthences à bas,
ligiéthe coumme eune plieunmette d'ouaîsé
sus les pièrres, oulle êtampe ses pas.

Chutte Danme-chîn danse dans san bliu fro
ès flianfliues sautant chîn' et là
par les galots, d'rocque en raccro
ou mèrque ses pids, la Danme des Pas.

San fro fliotte, un bliu cliu d'lânfrais;
sa fache lit au solé - s'n êcliat
fait trélûther les bords d'la baie;
et sus les rocques ou laîsse ses pas.

Les louêmes amouoch'lées lus aransent;
sa danse en siet les huthes et flias
sus l'harmonnie d'mathées. Ou danse,
not' belle ès rocques, not' Danme des Pas.