Nou r'quémenche châque journée à sinne dé jeu

Né v'chîn la poésie d'aniet, tch'appathaît ichîn pouor la preunmié fais, d'not' auteu du mais, Geraint Jennings:

Here's today's previously unpublished poem by our author of the month, Geraint Jennings:

Nou r'quémenche châque journée à sinne dé jeu;
les barres du jour en dêbarrent les hêmies,
et tout r'est clièrgi; l'chèrvé raîque un creux
qué, pouor lé sé, nou s'en va èr'remplyi.

Sus l's ais tout l'tou, les livres ont 'té viédgis;
châque page blianchie et châque pathole passecrite;
et l'cliai du ciel touônne la freûle dé papi
qu'nou taqu'tha atout les nièrs mots tch'êmittent,

et châque moment amouochèle des mémouaithes
si nos esprits ofûche vont mus bâtés;
ch'est d'nos arrouter auve eune chèrge ligiéthe
d'vant d'êt' souôlagis d'not' suffat au sé.

Et, quand j'nos dêbâtons d'nos d'bats au liet,
nos pensées dêpensent dans des pits d'nièrcheu,
et touos nos avis y sont lavechinnés;
nou r'quémenche châque journée à sinne dé jeu.