Ch'est chou! et la bête né bouoge, ma fé!

Né v'chîn la poésie d'aniet, tch'appathaît ichîn pouor la preunmié fais, d'not' auteu du mais, Geraint Jennings:

Here's today's previously unpublished poem by our author of the month, Geraint Jennings:

Ch'est chou! et la bête né bouoge, ma fé!

Nou fait d'san mus d'la faithe avanchi,
mais ou veurt tout sîmpliément rester;
i' faut paître là où'est qu'nou-s'est fitchi.
Ch'est chou! et la bête né bouoge, ma fé!

Ou n'bouog'gea pon, mais coumme un baîni
restétha à san rotchi cliutée,
ou, pus à co, fèrme coumme chu rotchi.
Ch'est chou! et la bête né bouoge, ma fé!

I' n'y'a pon mouoyen d'la faithe bouogi;
véthe, oulle est têtouongne coumme un choutchet,
chette-chîn n's'en va pon changi d'avis.
Ch'est chou! et la bête né bouoge, ma fé!

Mais y'en a tchi sont d'un aut' esprit,
et y'en a tchi sont mus avisés -
par eune cliamûthe ou un bouôn co d'pid.
Ch'est chou! et la bête né bouoge, ma fé!

Nou li'offre ofûche des gâchinn'nies,
ou nou m'niche atout eune lache du fouet;
mus vaut laîssi tchaie et y r'nonchi.
Ch'est chou! et la bête né bouoge, ma fé!